ہشت مارچ؛ ذالبولانی میاں استمانی روچ

تحریر: ظفر رند

میان استمانی دگنیاہا 8 مارچ ذالبولانی روچ برجم دارگ بیت. ای روچءَ ذالبولانی تاریخی جہد ءُ آہانی سرءَ بوتگیں ظلم ءُ ذوراکیانی سرءَ گپ ءُ تران کنگ بیت ءُ آہانی جدوجہد داد دیئگ بیت ءُ آہانی آوکیں باندات ءِ بارہا سلاہ ءُ شور جنگ بیت. بلے مرچیگیں اہد ءَ ای روچ دگہ رنگ ءُ دروشم ء برجم دارگ بوئگا انت ءُ ہرکس وتی رنگءَ ای روچ ء مچی برجم داریت ءُ دگہ رنگے دنت ءِ

ای روچ بندات چہ امریکہ آ 1908ء بیت. ای روچ ءَ مظلوم ءُ محنت کش ءِ ذالبول وتی بنیادی حق ءِ واستہ احتجاج کن انت ءُ وتی کار ءِ وہد ءِ کمی ءُ چائلڈ لیبر ءِ ہلاس بوئگ ءُ وتی بنیادی زلورتانی لوٹ ءَ کن انت. ہمے دروشم ءَ ای روانک رواج گیپت ءُ 28 فروری 1909 یکبرے پدا ای روچ برجم دارگ بیت. وتی لوٹ ءُ طلب ءَ اولی رند ءَ سال 1910ء کلارا ذتکن پیش کنت ءُ جوڈینیت. ایشی ءَ چہ پد ای روچ گیشتر رواج گیپت ءُ میان استمانی تیوگیں دنیا ہا ایشی لوٹ ءُ طلب زیادہ بیت

میان استمانی ذالبولانی روچ گیشتر جنگ عظیم ء وہد ءَ رواج ءُ نام در کاریت کہ چہ روس ءَ ذالبولانی یک روانک ءِ مذنیں کساس ءِ در کیت ءُ وتی بنیادی درستیں ضرورتانی لوٹ کنت. روزگار, ورگ ءُ ہرچ ءِکمی وتی بند بوتگیں مردینانی گر ءُ بندانی رہاہی ءِ کوکار ءُ جاک ءَ کن انت.
ہمی روانک روس ءِ فروری 1917 ءِ انقلاب ءِ بنیاد جوڈ بیت ءُ دیم ءَ اکتوبر ءِ ماہ ءِ انقلاب فتح حاصل کنت ءُ سویت یونین ءِ بن ہشت ایر بیت

انوگیں وہد ءَ ای روچ ءَ مختلف ءِ پارٹی ءُ گل آنی روچ ءَ یاتگار ءِ بابت ءَ جتا جتائیں مچی ءُ پروگرام کن انت. بلے آ روچ ءِ دروشم ءَ چہ پہک ءَ گستاہ ءُ جتا انت. ذالبولانی کتگیں جہد ءَ یکسر الگ کن انت ءُ دگہ دروشم ءَ ایشی دیم ءَ کارگا انت. بس عکس کشی ءُ وڈیو جوڈ کنگ داں آہانی جہد محدود انت.
ای روچ ءِ برجم دارگ ءَ ذالبول ءَ وتی خون ریتکگ ءُ جہد کتگ ءُ تاریخ توکا ابد مان انت. بلے مرچی ای کاروان ءِ فکر دیم ءِ برگ ءَ چہ گیش وتی مقصد پیش دارگ بوہگا انت

دنیا ءِ توکا ہرجاہ ءَ ذالبول ظلم ءُ ذیادتی ءِ دیم پان بوتگ انت ءُ ہر وہد ءَ آہانی سرءَ زوراکی کنگ بوتگ. وہد ءِ زالبولانی تاریخ ءَ بہ چارےءِ گڈا ای دنیا بازیں چیزانی بن ہشت ذالبولاں ایر کتگ انت. ای بابت ءَ قلمکار ءُ نبشتہ کارانی جتا جتائیں لیکہ ءُ حیال انت یک نبشتہ کار ءِ وتی کتاب تہا گشیت. ہندو میتھالوجی ءِ رد ءَ دنیا ءِ جوڈ کنوک یک ناچی ءِ زالبول ءِ ( پرا) بوتگ کہ آئی را (شکتی دیوی) اش گشتگ.
راجدپتر ءَ اولی یکجاہ ءُ منظمیں جنگجو یک جنین آدمءِ بوتگ ای باز ترسناکیں Barbarian قبل مسیح ءِ یک راج ءِ کہ نام ستن بوتگ. ایشانی ذالبول باز بہادر ءُ دلیر بوتگ انت.
ہیوکریٹس ءِ رد ءَ اے ہند ءِ زالبول ءَ دانکہ سے چار دژمن نہ کشتگ آروس نہ کرتگ

ھمے رنگ ءَ چین ءَ 1700 چہ گیش سرداراں 55 ریاستاں 516 قبل مسیح ءَ حونان, شان سی, شان تنگ, فینسی چن ءُ دگہ ہوار بوتگ انت. اے حکمرانی وہد ءَ بزاں 514 قبل مسیح چینی تہذیب ءَ پہ ذالبولاں عزت ء شرپ عروج ءَ بوتگ. چاوکنگ منش ءَ کنفیوش ءَ ابید حلوہ لاوتسی ءَ ہم چینی چاگرد ءَ بازیں برابری ءُ جوانی آورتگ. کوھنیں وہدءَ چین ءَ زالبول ءُ مردیناں یک وڈیں حق بوتگ انت

چین ءَ تا مزنیں مدتے ءَ ذالبول ءِ ہمے ارذشت ءُ بستار برجاہ بوتگ بلے وہدے (ہوانگ ہو)ءِ ہارءُ سیلاب بوت گڈا اے بستار ءُ ارذشت برجاہ نہ بوت. فیوڈل نظام ءَ پد ذالبول ءِ بستار پہک ءَ ہلاس بوت. ہمے وڈءَ وہدے ما چاپان تاریخ ء چاریں. شاہی زمانگ ءَ شش 6 بانکیں شہزادیاں حکمرانی کتگ. بلے 1721 ءَ پد وہدے جاگیردارانی نظام ہلاس بوت گڈا ذالبول ءِ ارذشت ءُ بستار ہلاس بوت. آہانی سرءَ ظلم ءُ ذیادتی کنگ بوت اگاں یکے ءِ ذھگ جنک بوت گڈا آئی وتی وارث جنک جوڈ نہ کرت بلکے دگرے بچک ذہگ زرت وتی مال ءُ ملکت ءِ وارث جوڈ کت

ذالبول ہر دور ءُ ذمانگ ءَ یا حاکم ءِ وش حالی ءُ سیری ءِ چیدگ بوتگ یانکہ ایردست ءُ کمزور بوتگ ءُ زور آورانی چیر دست بوتگ.
پہ ای زوراکی چاگرد ءِ پروش دیئگ المی انت ءُ وتی زالبول ءَ برابری بنیاد ءَ حق دیئگ بہ بیت