وانگ ءُ نیزگاری ءِ جیڑہ
نبشتکار: ھان ساجدی
اگاں ما اے مُلک ءَ بہ چار ایں چریشی ءَ ما ھمے سرپد بَہ ایں کہ ادءَ گریب ھچ ونت نہ کنت پرچاکہ گریب چَہ اے گِرانھادیں وانگجاھاں سک دور اِنت۔
لبز گریب ءِ نبشتہ ءُ وانگ سک آسان اِنت بلے ایشی تہ ءَ زند ءِ گْوازینگ گِران اِنت۔ دانکہ مردم نیزگاری ءِ زند ءَ مہ گْوازین اِیت آ ھچ اے لبز ءَ پھم اِت نہ کنت ءُ ھما مردم گریبی ءِ جاوراں سرپد بیت گوں ایشی ھمگرنچ بہ بیت۔
ھمے وڑا اے مُلک ءِ وانگی ترامگیجانی نھاد ھنچو بُرز کُتگ کہ گریب آھانی نام ءَ ھم گپت نہ کنت۔ ایشانی مول ءُ مراد ھمیش اِنت گریب گُلام بہ بیت ءُ رھبرانی وازمندگ ، بے زبان ءُ رھبرانی لگتمال بہ بنت ءُ وتی نیک رائی ءَ سرپد مہ بنت آھان ءَ وتی رژناھیں باندات ءَ دور بہ بنت وھدے گریب وان اِیت گُڑا آ یک وتواجھیں راجے جوڑ بیت ءُ دوئمی ءِ وازمندگی ءَ نہ کنت۔
مئے لھتیں وزیر ءُ گزیرانی مول ءُ مراد ھمیش اِنت کہ مئے راج چَہ وانگ ءُ زانگ گِست ءَ بہ بیت ءُ آ چَہ آزات ءَ آسودگیں زندے ءِ گْوازینگ ءَ بھ مہ جیڑ اَنت۔ اگاں ما بلوچستان ءِ وانگی جیڑھانی سرءَ چمشانکے بہ دے اَنت گُڑا ھمے گندگ بیت بلوچ نودربران ءَ چَہ وانگ ءُ زانگ ءَ دور کنگ ءِ بلاھیں پندل سازگ بُوّگ ءَ اَنت۔ ھمک روچ مئے راج ءِ پرزندانی زند گوں زھرشانی ءَ گُوزگ ءَ اِنت پرچاکہ آھانی جْھد ھمیش اِنت کہ نودربر مُدام گوں جیڑھاں دزگٹ بہ بنت ءُ وانگ اِش ھراب بہ بیت۔
چاگرد ءِ بازیں مردم ھمے گْوش ایت نیزگاری مردم ءَ چَہ وانگ ءَ دور نہ کنت بلے آھاں اے لبز چَہ کتاباں اِشکُتگ بلے نیزگاری ءِ تہ ءَ زندمان ءِ گْوازینگ سک گِران اِنت۔
مئے چاگرد ءِ دوئمی مستریں جیڑہ ھمیش اِنت کہ ادءَ دولتمندیں مردم گریب ءَ را وڑ وڑیں جیڑھانی تہ ءَ دور دے اَنت۔ بلوچستان ءِ تہءَ اگاں یک نیزگارے ءِ زھگ وان اِیت گُڑا آ راجدوستی ، آشوب ءِ نام ءَ گار ءُ بیگواہ کنگ ءُ تیرانی آماچ بیت پرچاکہ مئے وزیر ءُ گزیر ھمے گْوش اَنت کہ گریب ءَ ونت گُڑا آ چہ مئے گُلامی ءِ سانکلاں سِد اِیت ءُ یک وتواجھے جوڑ بیت ھمے پیم ءَ مئے ھبر زوری ءَ چَہ دور بیت۔
