بلوچی مئے وتی شھدیں زبان اِنت
نبشتہ کار: نعیم مومؔن
ما انگت نہ زان ایں کہ مئے راجی زبان ءِ اَرزشت چے اِنت چی ءَ کہ زبان یک راجے ءِ ساہ اِنت ءُ ھر راج ءِ اولی پجّار آئی ءِ زبان انت۔ اگاں ما زبان دوست مہ بہ ایں گُڑا راج دوست چِتور بہ ایں؟
مئے چاگرد ءِ تہ ءَ ھمک وانندگیں مردمے گْوش اِیت کہ بلوچی مئے شھدیں زبان اِنت بلے ھمے نبشکارانی ھرچ نبشتانک، کلوہ ءَ بہ چار اِت دراہ ماں دری زبان ءَ اِنت ءُ وھدے دیوان ءَ نند اَنت گُڑا ھمک گال ءُ گُپتار ءَ گوں انگریزی ءُ اردو لبز ھَوار گپ کن انت بزاں وتی گپ ءُ تران ءَ وتی راجی زگریں گالاں ڈالچار کن اَنت ءُ ارود ءُ انگریزی ءِ گالاں زیر اَنت۔
مئے راجی سروکانی گْوشتانک ءُ مئے ھالکارانی ھالتاک اردو ءَ اَنت! مئے زانتکارانی ھرچ نبشتہ اردو ءُ انگریزی ءَ اَنت۔ مئے راج ءَ وتی جِند ءِ زبان بیھال کُتگ ءُ کبزہ گیر ءِ زبان سر ءِ تاج کُتگ۔
باید اِنت کہ ما وتی راجی زبان ءَ چو ڈالچار مہ کن ایں بلکیں ماں گُپتاری وتی راجی زبان ءِ کْوھن ءُ زگریں گالاں کارمرز بِہ کن این ءُ نبشتہ کاری ءَ ھم بلوچی ءِ گالاں نبیسّ ایں۔ ما تچک بہ زان ایں کہ بلوچی ھما وھد ءَ دیمرئی کنت وھدیکہ ما راجی نبشتہ کار بلوچی نبیسّگ ءِ وھد ءَ وتی بلوچی ءِ زگریں گالاں نبشتہ کاری ءَ نبیسّ ایں بلے بژن بیت کہ لھتیں مردم بلوچی نبشتہ کاری ءَ اردو ءُ دری زبان ءِ گالاں کارمرز کن انت۔
اگاں ما انگریزی زبان ءَ بہ چار ایں گُڑا زان ایں کہ انگریز ءَ انچو دیمرئی کُتگ کہ آئی ءِ راج ءَ دری زبان نبشتہ نہ کُتگ ءُ ماں دری زباناں گپ ھم نہ جتگ۔ اگاں ما لوٹ ایں کہ مئے ڈیھ ءَ گوں ھَوار مئے راجی زبان دیمرئی بہ کَنت گُڑا مارا وتی راجی زبان ڈالچار کنگی نہ اِنت بلکیں زگریں گال ماں دیوان ءَ کارمرز کنگی اَنت۔
مئے راجی زبان مارا وانگجاھاں وانینگ نہ بیت گُڑا اے مئے زمہ واری اِنت کہ وتی راج ءِ آوکیں پدریچ ءَ را وتی زبان ءِ بابت ءَ سرپدی بہ دے ایں کہ زبان ءِ بستار ءَ بہ زان اَنت۔
گوں راج ءِ زانتکاریں مردماں دَزبندی اِنت کہ راج ءِ دیمرئی ءِ واست ءَ جْھد بہ کن اَنت ءُ راج ءِ پُسگ ءُ پدریچاں ءَ بہ وانین اَنت ءُ سرپد بہ کن اَنت۔
بلوچ میزران بات انت ءُ راجی زبان دیمرئی کنات۔
