چماک چلّوفس

وہید انجمؔ

ہخس چم خلکرے بسّ ائے نمے، چمّاک چلّوفس
سفاؤ ہیت نم تون اف، نما روغاک چلّوفس

نما دا ہیت کہ نن کل اسٹّ اُن ملک اسٹ مسّک
دا وڑ نا آمخا بے کاٹما ہیتاک چلّوفس

وطن نا بیرک ئے ہر جاگہ غا بُڑزا کرو ورنا
نواب و میر، ملّا، ٹکّری، سردارک چلّوفس

بلوچ ئے پار اوّل نی بلوچی فکر تِخ! بیرہ
پِن ئٹ لکّھنگ یا پاننگ نا شوشاک چلّوفس

پدی کشّور تینے یا سفر نا نیمہ ٹی نرّور
وفا نا کاروان ئٹ بے وفا، بِھیخاک چلّوفس

ڈغار ئس کوزہ مس انجمؔ کنا دانشور ئے پابو
کرک نی فلسفہ نا فیصلہ، چاچاک چلّوفس