(راجدوستی)

وہید انجمؔ

ہر اسٹّ ئے راج تینا دوست ائے
دنیا ٹی بندغ نا نشانی راج مسّک
پیدواری دود ئسے آن
ملک یا راجی زبان آن
راج ارے تو کل مریرہ رست داڑے
راج ئتو چائنگک اینو ہر اسہ بندغ ڈغار آ
راج پائک:
دیر ئسے دا؟ دیر ئسے اے؟
دانا دھرتی دادے، اے نا دھرتی ایدے
دُن پا باوہ، پیرہ، بُن پیرہ مرے بھلّا کماشاک
انت اسّر اوفتا خْیالاک تینا زندگی ٹی
زند ئےگدریفنگ کن کاریم ہلکر انت انت آن؟
زندگی نا خرّنی ٹی
لمّہ جیجا تا افال اس
راج ئتو ڈھکّوک تینا لوز لوز ائے
جنگ ئنا اے داستان ائے
خیر ئنا تاریخ ائے مچّا
سوچ ئنا مُستی ردوم ائے
مرک ئہ زند ائے، دو ٹی ہلّنگ و میار ائے
مودہ زالاتا گدان ئٹ
شْوان نا لیکو ائے مشتیٹ
سانگ بندی، خْوشّی ،ہالو تو براماک
لیلڈے ، برناز ئنا، چاپ ئس مسن تا
مہر کپ کس راج ئتو تینا گُڑا پین انت ئسے بد بختی پابو!
راج تینا دوست ائے ساہ آن زْیادہ
راج ئنا ہنکین ، بولی
راج ئنا ٹیوار تینا، رسم ئتو دستار تینا
راج ئنا دا مہروانی ائے ننے تسّک شناختْ
او پن ننے تس، ڈس ننے تس
داڑے چیدہ، سیم و سند ائے
راج ئنا زیبا زمین ائے
ٹُکّر ائے دشمن تا دو آن
خیسن ائے دشمن تا دو آن
جان کائک
کائِہ پانے راج زندہ باد پانہ، نن امر الّین تینے
تینا ڈیھ ئے تینا دود ئے؟
کوزہ گیر ئے دود و رسم اف
اُست خْواہی راج ئتو کر
راج تینا دوست ائے ساہ آن زْیادہ
راج تینا دوست ائے کلّ آن زْیادہ