بلوچ ءَ را گوں فلسطین ءَ کار ھست؟
تحریر: حبیب کریم
پاکستان ءِ تہءَ فلسطینءِ جیڑہ ءِ بابت ءَ جِتا جِتائیں ھیال ءُ لیکہ داروکیں مردم ھست اَنت۔ ایشانی تہءَ مسترین تبکہ ھما اِنت کہ اِستان (ریاست) ءِ بیانیگ (بیانیہ) ءِ منّوگِر اِنت۔ استان ءَ ایشانی ھمے وڑ سسا سازی کُرتَگ کہ اے شہ کاپری ءُ مسلمانی بھس ءَ ڈَن فلسطین ءِ جیڑہ ءِ سرءَ جیڑگءَ ھم تیار نہ اَنت۔ پچے کہ اے ڈیھءَ ھندوستان دژمنی ءِ پیمءَ اسرائیل دژمنی ھم وتی دری (خارجہ) ءُ تہی (اندرونی) پالیسیانی بُن پادگ (ستون) جوڑ کرتگ، تاں کہ مہلوک ءِ دینی جزبگاں وتی مپادانی واستہ کارمرز بہ کنت۔ ھمے وڑا دومی نیمگءَ پاکستان ءِ دینی گَلاں اے جیڑہ ءَ را وتی کارءُبار ءُ زر کشی ءِ وسیلہ جوڑ کُرتگ۔
دومی مستریں ٹولی پاکستانی آزات ھیالانی (لِبرل) اِنت۔ انّوگیں جاوَراں کہ فلسطین ءِ گپ یک رندے پدا تیوگیں دگنیا ءِ تہءَ راجمانی سوشل میڈیا، الیکٹرانک ءُ پرنٹ میڈیا ءَ چَلَگءَ اِنت، اے آزات ھیال ایوکا گوں دینی تَبکہءَ وتی کستءُ کینَگ ءِ سبب ءَ اسرائیل ءِ پلامرزی کَنَگءَ اَنت۔ اے رِدءَ آ اے دلیل دے انت، چو کہ ھماس اسرائیل ءِ سرءَ راکٹ جَنت۔۔۔ ھماس ءَ ایران کمک ءَ کَنت۔۔۔ ھماس ھر رمضان ءِ ماہ ءَ راکٹ گواری کنت تاں کہ چیزے کلدار بہ رسیت ئے۔۔۔ بزاں اگاں فلسطینی راکٹ جَن اَنت گڑا آ پہ اسرائیل ءَ اُرُشءِ جواز وت پیدا کن اَنت۔۔۔ فلسطینیاں بیستمی کرن ءِ تہءَ وتی ڈگاراں چیا گوں جہوداں (یہودی) بھا کُرت اَنت۔۔۔ اے زمین اسلءَ جہودانی اِنت۔۔۔ جہودی (یہودیت) شہ اسلام ءَ کُہن تِریں دینے ۔۔۔ مسلمان پدا آتگ اَنت ءُ دگہ دگہ۔۔۔
ادءَ سیمی تَبکہ ھما بلوچ راج دوست ءُ پاکستانی دیمرئی دوستیں (ترقی پسند) مردم اَنت کہ آ دپتری بنیات ءَ اسرائیل ءَ زورگیرءُ زالِمے لیک اَنت ءُ فلسطین ءِ پلامرزی ءَ کَنَگءَ اَنت۔ البت اے پاکستانی لیفٹسٹانی تہءَ چیزے چوشیں مردم ھم ھوار اَنت کہ آ بلوچانی پلامرزی ءِ بابتءَ یک پدَریں اوشتِنے (موقف) نہ دار اَنت. وھدے کہ بلوچ سر ڈگارءِ گپ بئیت گڑا اے ڈڈیں ”محب وطن“ او پنجاپی شاؤنسٹ جوڑ بہ اَنت۔
منی وَ ھچ سر بِر نہ بیت کہ اے آزات ھیال چونیں مجگانی واھُند اَنت۔ ایشانی بابت ءَ مردم ھچبر پیش گُشی کرت نہ کنت کہ کجام کجام جیڑہ ءِ بابت ءَ ایشانی لیکہ چے بوت کَن اَنت، بلے انکس مردم زانت کہ ایشانی لیکہ ھر وڑ بِہ بنت۔۔۔ آ پُھتگءُ مھکمیں لیکہ نہ بنت۔ اے ھما دوپوستیں آزات ھیال انت کہ وھدے بلوچستان ءِ گپ کہ کئیت گڑا اے ھاکم ءِ پلامرزی ءَ انچو کَن اَنت ءُ چوکہ مروچاں اسرائیلءِ پلہءَ گِرگءَ اَنت۔ بلوچانی سرءَ وتی ڈیھ ءِ زلم ءُ زوراکیانءَ چو روا (جائر) گُش انت کہ وھدے ”ڈبلیو ایف او“ ءِ پوریاگرانی کوشءَ وتی منانک ءِ بنیات جوڑ کَن اَنت ءُ وھدے انچیں دگہ بے سرءُ بُنیں دانکےءِ آسرہءَ گِر انت۔ اے شہ دینی ٹولیاں ھم گیش سرگردانیں (کنفیوزڈ) تَبَکہ یے۔ دینی گَل کم تاں کم زانگ بنت کہ چے گُشَ اَنت ءُ چے لوٹ اَنت۔ بلے اے آزات ھیال انچیں ھَوَردگ (آمیزہ) ءُ مسکرا اَنت کہ ایشانی دو رنگی ءَ مردم ھچ پجا آوُرت نہ کنت۔
انوں جیڑہ ایش اِنت کہ مئے بلوچ راج دوستانی یک مزنیں بہرے ھم فلسطین ءِ جیڑہ ءِ بابتءَ گوں پاکستانی آزات ھیالاں ھمپَت اِنت۔ بزاں ایوکا گوں دینی تبکہ ءِ وتی ناٹہیانی (اختلاف) سببءَ اے فلسطین ءِ جیڑہ ءَ ارزشت دیگءَ نہ اَنت۔ تُری کہ راج دوستیں بلوچانی لہجہ اے رِدءَ کمّو نرم اِنت بلے ایشانی ھساب ءَ چو کہ بلوچءِ جندءِ جیڑہ وت سک باز اَنت، پمیشا بلوچ ءَ را گوں فلسطینءَ کار نیست۔ اِدا من یک جُستے شہ ھمے راج دوستیں بلوچاں کَنَگ لوٹِین کہ اگاں شُما ایوکا ھمے بنیاتءَ فلسطین ءِ جیڑہ ءَ ارزشت دیگءَ تیار نہ اِت, گڑا کُرد ءُ ایدگہ ایردستیں راجانی گپ ءَ چیا کَن اِت؟ باھد اِنت اودا ھم ھمے منانک ءِ بنءَ ھاموش بِہ بہ اِت. بلے نہ۔ شہ ایشی پدر بیت کہ اے تزات اَسلءَ شہ مئے جندءِ جیڑھانی سببءَ نہ اِنت، بلکیں ایشی بنیات گوں پاکستانی آزات ھیالاں ھمگرنچ اِنت، بزاں دینی تبکہ ءَ گوں ناٹہی ءُ فلسطینءِ آزادیءِ جنزءَ دینی جیڑہ یے لیکگ۔
تنا کساسءَ کہ من سرپد بِین فلسطین ءِ جیڑہ ھچبر دینی نہ اِنت۔ اے سرجمءَ سیاسی جیڑہ یے۔ چو کہ بلوچءِ جیڑہ دپتری رنگ ءَ نسلی نہ انت، ھمے وڑءَ فلسطین ءِ جیڑہ ھم دینی نہ انت۔ ایشی سرپد بُوَگءِ ھاترا ھژدری اِنت کہ فلسطین ءِ عربانی راجدپترءُ بیستمی کرن ءَ فلسطینی سرڈگارءِ سرءَ اسرائیلی آبادکاریانی بازیں سبب وانگ بہ بنت۔۔
اے رِدءَ اے الّم زانَگ لوٹ اِیت کہ سیہون گری (Zionism) ءِ بندات شہ کجا ءُ چون بوتگ۔۔۔ شہ یورپ ءَ جہود پرچہ درآیَگءُ دگہ جاھے آباد بوگ لوٹ اِت اَنت۔۔۔ آھانی آبادکاری ءُ یک جہودی استانے ٹھینگ ءِ واستہ برطانیہءَ پرچہ آھانی کمک کُرت۔۔۔ ایشی تہءَ برطانیہ ءَ را چے پائدگ رَسَگءِ امکان ھست اَت۔۔۔ پدا فرانس ءُ امریکہ پرچہ اسرائیلءِ پلامرز (حامی) بوت اَنتءُ آئی ھر وڑیں کمک ءِ ڈُبہ زُرت اِش۔۔۔ فلسطین ءِ گہگیری جنزانی (مزاحمتی تحریک) تہءَ فلسطینءِ عیسائیانی کرد چنکس بوتگ۔۔۔ چے فلسطین ءِ تہءَ تہنا مسلمان جامنند اَنت یا عیسائ ھم ھست؟۔۔۔ شہ پی ایل او ءِ یاسر عرفات، پاپولر فرنٹ ءِ جارج حباش او لیلیٰ خالدءَ بہ گِر تاں زانتکار ءُ کوّاسیں ایڈورڈ سعیدءَ کئے مسلمانے بوتگ ءُ کئے عیسائی یے۔۔۔ اے دراھیں چیز زانَگ لوٹ اَنت۔ ھمے پیمءَ اے سابت کَنَگءِ واستہ کہ فلسطین ءِ جیڑہ زگریں سیاسی جیڑہ یے، یک جتائیں ورداسی (تفصیلی) نبشتانکےءِ نبیسگ پکار بیت۔ چیا کہ فلسطینی جیڑہ ءِ سیاسی دپتر سادگ ھم ھست ءُ باز پیچیدگ اِنت ھم۔
گپءَ گونڈگرانءَ من اے گُشِین کہ بیستمی کَرن ءَ دو مُلک نیکراہ ءِ نامءِ سرءَ جوڑ کَنَگ بوت. بلے اسلءَ ھردو ملکانی جوڑشتءَ را گوں نیکراہ ءَ ھچ پیمیں سیادی نہ اَت۔ ھر دو ملکان ءَ شہنشاھی (امپیرئیلسٹ) تاگَتاں وتی نپ ءُ پائدگانی واستہ ٹہینت انت. ھر دو ملکانی بُنگیج کارانءَ (جناح ءُ بین گریون) گوں دین ءَ ھِچ وڑیں سیادی یے نہ ات ات۔ ھر دو ڈیھاں وتءَ را دینی دروشمءِ گوناپ پدا داتگ۔
اگاں کسّے وت پٹءُ پول کنگءَ رند اے دانکءَ سرپد بوت کہ فلسطین ءِ بُنکی جھد گوں دین ءَ بندوک نہ اِنت گڑا باھد انت آئرا اے جستءِ پسّہ بہ رس اِیت کہ ”جی ھئو! پکا بلوچ ءَ را گوں فلسطین ءَ کار ھست“۔ بلے چون ءُ چے پیمءَ کار ھست؟ اے جتائیں ھبرے۔ بلے یک ایردستیں راجےءِ نپر (فرد) ءِ بستارءَ من ذاتی رِدءَ وتی ھاترا اے الّمی زانِین کہ من کم تاں کم اسرائیل ءِ وڑین زالم ءُ کبزہ گیریں استانءِ پلامرزی مہ کنِیں. ءُ سیاسی بنیاتءَ گوں وتی زبان ءُ ند ءَ فلسطین ءِ اخلاقی پلامرزی ءَ بہ کنِین۔ نہ پاکستانی آزات ھیالے جوڑ بِہ بِین ءُ نہ پاکستانی چپ دست واھے۔ بلکے یک زُلمواریں بلوچے ءُ لسَیں دیمرئی دوستےءِ بستارءَ دگنیا ءِ تہءَ ھر ایردستیں راج ءِ وتی کَچ ءُ گشادءَ پلامرزیءَ کِنین۔
