آزمانک: شیہو ءِ امبر

خلیفہ بلوچ

چاردہ ءِ ماہ ءَ وتی مہکانی مانشاتگ اَت۔ کوہ ءُ گَٹ دُرست چہ ماہ ءِ رُژن ءَ گندگ بوگ ءَ اَنت۔ شیہک بُرز کوہ ءِ ٹُل ءِ سرا نشتگ اَت ءُ ماہ ءَ نِدارہ کنگ اَت۔ ماہ مرچی چو بانور ءَ سمبہیتگ اَت ءُ آ سک زیبدار اَت۔ پدا ءَ کوہ ءِ بُرز ءِ ٹُلاں چہ بار بار وتی دیماں گران اَت چو کہ بانور ءِ وتی دیم ءَ بہ گیپت۔
شیہک ءِ چَم ارسیگ اِتاں آئی چماں چہ کدی ہم ارس گندگ نہ بوتگ بلے مرچی آئی چم ارس اِتاں۔ شیہک ءَ چار سال ءَ گیش اَت کہ آئی ءَ پہ وتا کوہ ءِ زند گیچین کُتگ اَت۔ ءِ وھد ءَ آئی بازیں سکی ءُ سوری دیستگ اَت۔ گُژن ءُ تُن ءَ بگر داں تیرواریں درداں آئی دُرست دیستگ اَت۔ ہمی وھد ءَ آئی ءِ کماش ءَ ہم وفات کُتگ اَت بلے ءَ آئی ایمان چو سائجی ءِ کوہ ءَ مھکم اَت۔ آئی چماں ارس مان نیست اَت۔ آ جُہد ءَ گوں نہ تُرسوکیں جزبگاں جُنزان اَت۔ ءِ جاورانی دیمپانی ءَ آئی ءِ چماں کدی ہم ارسیگ نہ گوار اِت بلے مرچی آئی چم ارسیگ اِتاں ءُ آ ماہ ءَ ندارہ کنگ اَت۔

مرچی ہپتگ ءِ سرجم بوتگ اَت کہ آئی لوگ بانُک امبر جوریں دُژمن ءَ آوار جتگ اَت۔ پیسرا ہم شیہک ءِ لوگ ءَ باز رنداں چاپہ بُوتگ اَت ءُ یک رند ءِ پیسرا ہم آئی لوگ بانُک 3 روچ ءِ واستہ آوار جنگ بیتگ۔ شیہک چہ امبر ءَ وتی سورءِ اولی ہپتگ ءَ چہ سستگ اَت ءُ کوہ اتکگ اَت پدا آئی امبر نہ دیستگ اَت۔
امبر ءَ گوں آئی کدی ہم مہر نہ بوتگ آئی ءِ آروس پہ وتی مات ءِ بازیں گُشگ ءَ پد کُتگ اَت۔ آئی پہ امبر ءَ اِچ وڈیں مہر نہ بوتگ۔ آئی دل گوں امبر ءَ کدی ہم ہور نہ بوتگ پمیشکہ آئی ءَ اِچبر وتی لوگ ءِ روگ ءِ ارادہ ہم نہ کُتگ۔شیہک ءَ وتی زمین ءِ دوستی سک اَست آئی وتی زمین ءِ ساہداراں ابید آئی ءِ ڈوک ءُ ڈل کرز ءُ پِش زِر ءُ بوجیگ دُرستاں گوں مہر اَت۔

شیہک ءِ گیشتریں زند شہر ءَ آئی ناکو ءِ گورا گوستگ اَت آئی ہمودا نشتگ ءُ ونتگ اَت بلے انگت ءَ آئی ءَ شہر ءِ تب ءُ ہیل چہ اِچ پولنگ نہ چتگ اَت۔ آئی انگت وتی کاپُر ءُ کُڈِک دوست اِتاں۔ آئی وتی زمین دنیا ءِ دُرستیں چیزاں چہ دوست تر اَت۔ آ پہ وتی ڈیھ ءَ شیدا اَت آئی وتی ڈیھ ءِ کُلیں شے دوست اِتاں بید ءِ امبر ءَ۔ آئی ہردیں کہ لوگ ءَ وتی مات ءِ سرا حال پُرس ءَ واستہ فون کُتگ اَت گُڈا مات ءَ مُدام ءِ زنگ جت کہ تو امبر ءِ حال ءَ نہ گریت آئی گوما گپ نہ کن ءِ بلے آئی ءِ دل اَت کہ امبر ءِ واستہ اِچ جاگہ ءِ نیست اَت۔ بلے مرچی شَپ آئی چم پہ امبر ءَ سک ارسیگ اِتاں۔

مرچی شیہک دل ءَ بس ہمبر ءَ جیڑگ اَت۔ آ بےکساس پہ ہمبر ءَ جیڑگ اَت، آئی دل پہ ہمبر ءَ سک ضعیف اَت ءُ آ سک پشومان اَت۔ ءَ جیڑگ اَت کہ ہمبر مرچی زوراکی ءِ زندان ءَ پہ کئی ھاترا بند اِنت ءُ باریں آئی حال چی بیت باریں ءِ رستر آئی گوما چی چی کن اَنت باریں آئی پُلیں بدن پہ منی ھاتر ءَ چی چی سگگ اِنت۔ الم آئی ءِ سزا پہ منی ھاترا دیگ بوگ اَنت۔ آئی ءَ منی باروا جُست ءُ پُرس کنگ بوگ اِنت گُڈا آئی ھاموشی آئی ءَ گیشتر تکلیپ دَنت۔آ ءِ رسترانی نیام ءَ تہنا یک جوانیں جِنک اِت باریں آئی گوم ءَ چہ بیت ءَ انوں کُجام حال تہا بیت۔

اگاں امبر در بئیت اِنت گُڈا بازار ءِ مردم باریں آئی ءَ چی چی گُش اَنت، آ گوں ءِ بُہتاناں ءَ چی پئیم ءَ زندگی کنت۔ آ کُجام کُجام گپ ءِ جواب دات کنت۔ آ کُجام کُجام ٹپاں بے حال کنت۔ آ کُجام کُجام درداں شموشت کُت کنت۔
امبر چہ وتی زند ءَ بیزار نہ بیت بلے امبر پہ کُجام اوست ءَ زندگ بُت کنت۔ آئی ءِ زند پہ آئی مستریں زِندان جوڑ بیت۔

شیہک ہمی حیالانی اندرا گار اَت ءُ شپ وتی زوراکیاں گوں تہار بوان اَت، ماہ ءِ رُژن گیمران اَت، کئوش ءِ بالاد پُروشان اَت، ای بانوریں شپءَ چہ شیہک ءِ چماں ھون ءِ ارس ریچگ اَت۔

شیہک وتارا سک ملامی کنگ اَت ءُ سک پشومان اَت کہ آ ہم گوں دژمن ءَ آوار اِنت پرچہ کہ آئی ہم گوں امبر ءَ باز دگا کُتگ۔ آئی ہم بلاہیں مُدت ءِ تاں امبر بے مہر کُتگ۔ آئی  ہم امبر ءِ سرا باز زُلم کُتگ کہ چنچو وہد بوتگ کہ آئی یک رند ءِ ہم امبر ءِ حال نہ گِپتگ۔ امبر ءِ پُلیں بدن پہ منی انتظار ءَ چنچو وداریگ بوتگ ءُ ءِ ودار ءِ آس ءَ آئی مہلبیں بدن چنچو ازیت کُتگ۔ آئی باریں چنچو واہگ ءُ واہشت پہ منی مہر ءِ ھاترا پاہو داتگ۔ آ باریں چنچو رند ءَ گوں وتی ہمساہگ ءُ دَزگھاراں سمبہیتگ بلے گوں ارسیں چماں وتی زیبائی پہ منی ھاترا ارس ءُ آپ کُتگ اَنت۔ آئی باریں چنچو رند ءَ آدینک ءَ بس منا چاریتگ۔ بلے یک نیمگ ءَ من ءَ چو زورآور کور بوتگاں کہ انچو وھد ءَ پد ہم امبر مہر نہ دیستگ ءُ آئی ءِ مہر سزا داتگ۔ من ہم مرچی گُناہ گاراں مرچی من ہم امینچو مجرم ءَ کہ زورآوار اِنت کہ مُپت ءُ نا حق کسی ءَ را سزا داتگ ءُ آ چہ آئی حقاں زبہر کُتگ۔

شیہک ءِ دل پہ ہمبر ءَ سک واز مندگ اَت نو آئی دل ءَ مہر پہ امبر ءَ سریچ اِتاں آئی دل پہ امبر ءَ زہیرونک پِر بندگ اَت۔ آ پہ امبر ءِ دیدار ءِ تلوسگ اَت۔ امبر ءِ دیدار آئی دل سرا چو گران بہائیں کوہ ءَ ایر اَت۔ آئی دل ءَ پہ امبر ءَ بےکساس مہر پیداک اَت۔ آئی ءِ دل ءَ باز ھبر ءُ واہگ پہ امبر ہست اَت۔ آ گوں ہمبر ءَ نند ءُ نیاد ءِ واستہ تلوسگ اَت۔ آئی چماں بازیں واب ودی بوان اَت۔

شیہک ءَ چم چست کُت چاریت کہ وہد نوں سُہب اَت یک نوکیں سُہب اَت نوکیں چاڑ ءَ۔ روچ وتی بانزُلاں پچ کنان اَت ءُ آئی ءَ وتی چپ ءُ چاگرد ءَ چاریت کہ کوہ چہ ابید دگہ اِچ نیست اَت۔ ای کوہ نیام ءَ نشتگ اَت ءُ وتی مہر امبر ءَ جیڑگ اَت کہ آ بندیگ جاہ ءَ بند اَت کہ باریں کدی آ آجو بیت ءُ باریں کدی من گوں ءِ زوراکاں جنگ کنانءَ آئی سر بہ باں۔ آ جیڑگ اَت کہ باریں کدی ءَ گوں وتی مہر ءِ ہم نپس ءَ آوار بیت۔ باریں ءَ دوئیں ہم نیاد بنت کہ نہ بنت۔ آ جیڑگ اَت کہ باریں امبر سلامتی کئیت یا ہمودا آئی مہر امبر چہ بازیں زوراکیاں چہ آئی سِدیت باریں ءَ داں ہمبر ءِ آجوئی تک جنگ جاہ ءَ داشت کنت اگاں پیسرا تیر ءِ باہوٹ بیت۔ آئی گوں ہمی جیڑگاں سوت ءِ الہان کنگ بندات کُت;
اے مہر ءِ پڑیں
اے جنگ ءِ تہا
کہ باریں مریت
کہ زندگ بیت۔۔۔