تُنگان بےسما کِن کوکار لکھنہ

درویش بلوچ

تُنگان بےسما کِن کوکار لکھنہ
آجوٸی نا تران ئے شوکار لکھنہ

اِعزاز لکھنہ اگہ ورناتہ قوم ٸنا
گودی تِہ ڈیھ ٸنا تینا دستار لکھنہ

دا زندگی ئے تینا کینہ پِن آ وطن نا
اسہ وار نن کہ آہہ سدوار لکھنہ

ہنت پاس لکھنہ گڑا ہنت چاس لکھنہ
ورناتِہ راج ٸنا تینا غمخْوار لکھنہ

دھرتی نا شہیداتِہ آجو نا اُمیداتِہ
مِستائی سُہب ٸسے نا اِستار لکھنہ

تقدیر اگہ دوٹی مرے نسلاتا راج ئنا
ظالِم نا مونغا گُڑا تلوار لکھنہ

سڑدار، ٹکری کِن دا راج ٸنا کنوکا
درویشؔ نن نواب ٸکہ غدار لکھنہ