علم ءِ در برگ پہ بلوچ ءَ گناہ ءِ!

نبشتہ کار: ظفر رند

ہر ہما بلوچ ورناءَ کہ آئی ءَعلم در برگ ءِ اُو مزنیں وانگجاہ ءَ سر بوہگ ءِ موہ رسیت آ بزانکہ ای اہد ءِ مستریں خوش نصیب انت اگاں یک لوگ ءَ چہ سیادی داروک ءِ بچ ءِ یہ جنک ءَ ای موہ رسیت اُو مزنیں ادارہ ءَ سر بوت تو بزانکہ آئی پشپد مزنیں قربانی دئیگ ءَ انت اُو بزگی برداشت کنگ ءَ انت ہمیں ورناہ کہ مزنیں شھر ءَ پہ وانگ ءَ کہ دیم دئیگ بیت آئی ءِ مات ءُ پت پہ بزگی اُو شُد لاپی وتی زند ءَ گوازین انت اُو پہ بزگی آئی ہرچ ءُ درچ ءَ برداشت کن انت بلئے وہد ءِ کہ ہمیں بچ ہزار ازیت برداشت کنگ ءَ پد کہ وتی گُڈی منزل ءَ سر بیت آئی ءَ ہمینچو ظلم ءُ زوراکیانی دیمپان بیت کہ آ وت ہمیں جیڈگ ءَ مجبور بیت کہ پرچہ من ای راہ ءِ مسافر بیت ءَ اُو وتی پشپد اینچو تکلیف دات !

دنیاءِ ای دگہ راجانی تہا ای ہبر مزنیں ہبرءِ نہ انت کہ کجام بچ کجام واھشت ءَ درایت اُو کجام وانگ جاہ ءَ ماں وانگ ءَ روت بلئے پہ بلوچ ءِ زھگ ءَ ای یک مزنیں جیڈہ ءِ! آئی درور ہمک روچ مارا شال ءِ سارتیں سرزمین ءِ سر ءَ گندگ ءَ کیت انت کہ کجام بزگی ءُ بدحالی ءَ بلوچ ورناہ علم حاصل کنگ ءَ انت ! آ پہ وانگ ءَ چینچو تنیگ انت چینچو ازیت برداشت کنگ ءَ انت بلئے انگت ہمک روچ ہمیں نودربر ءَ ہمیں احساس دئیگ بیت کہ آ وتی سرزمین ءَ سر ءَ پہ آزاتی علم ہم در برت نکنت !

شال ءِ سرزمین ای گپ ءِ الم ءَ گواہی ءَ دنت کہ بلوچ ءِ سرزمین ءَ سر ءَ ودی بوتگیں ورناہ پہ چینچو بزگیں اُو بدحالی زند گوزاینگ ءَ انت اُو کجام زوراکیانی آماچ انت بلئے انگت آ پہ وتی وشحال ءِ باندات ءَ ہاتر ءَ جہد کنگ ءَ انت اُو پہ پہر ءُ شان ای ازیت ءَ برداشت کنگ ءَ انت !

مروچی ءَ چہ کساس ہفتاد ءُ شش 76 روچ انت کہ نودربر ماں شال ءَ زھرشانی ءَ کنگ ءَ انت بلئے ای اہد ءِ حکمرانانی کِرا اینچو وہد ہم نیست انت کہ آ ای نودربرانی جیڈہانی گوشدارگ ءَ برو انت اُو ایشانی جیڑہ حل بکن انت ! حکومتی جماعت بہ بنت یہ اپوزیشن ءَ نندوک ءِ قوم پرستی نام ءَ جاک ءُ کوکار کنوک بہ بنت ای دوئی ای وہد ءَ پہ بلوچ نودربرانی جیڈہانی سر ءَ سنجیدہ نہ انت ! کس ءِ ماں ٹویٹر ءَ پوسٹ دنت اُو کس ءِ سہت ءَ کیت اُو ہمیں زھرشانی ءَ سر ءَ عکس ءِ گیپت اُو وت ءَ بے میار کنت ! بلے راستی ہمیںش انت کہ آ وت ہم ای جیڑہانی سر ءَ سنجیدہ نہ انت !
ای پیم ءِ حالت ءَ نودربرانی سر ءَ ہمیں زمہ واری بیت انت کہ وت مہ وت ءَ تپاک ءُ یک مشت بہ بنت اُو وتی بنکی جیڈہ بزور انت ای وہد تپاکی ءُ یک مشتی وہد انت یکجای وہد انت وتی جیڑہ سرپد بوہگی انت اُو نودربرانی صف ءَ اُوشتگی انت دانکہ ای زھرشانی ءَ نندوک ءِ نودربر طاقتور بہ بنت اُو وتی حق ءِ پچگرگ ءَ سوبمند بہ بنت !

اتحاد اتحاد پہ روچ ءَ اتحاد