زبان زندگ ءِ راجانی نشانی انت

نبشتہ کار: ظفر رند

راج ہما وہد ءَ زندگ بنت اُو دنیا دیم ءَ پجارگ بنت کہ آہانی راجی زبان زندگ بیت اُو طاقتور بیت ہمیں ہاتر ءَ مئے واستہ المی انت کہ ما وتی راجی زبان ءَ زندگ کنگ ءِ ہاتر ءَ پہ جہد بکنیں اُو دنیا ءَ ای گپ ءَ باور بکنائین ءِ کہ مارا ہم وتی راجی زبان ءَ گوں مھر ءُ دوستی است انت۔
دنیا راجدپتر ءَ ہما راج ءَ دیمروئی کُتگ کہ درست ءَ چہ گیش آہاں وتی راجی زبان اہمیت داتگ اُو زبان ءِ دیمروئی ہاتر ءَ کرد ادا کُتگ ! زندگیں راجانی مہلوک وتی زبان کلچر دود ءُ ربیدگ ءَ گوں مہر دوستی کن انت ۔

انچوش کہ جاہ ءَ واجہ سید ظہور شاہ ہاشمی گُشیت

لہتیں منا گُش ایت گنوگ
لہتیں منا گُش ایت شیپتال
منی میار ایش انت کہ من وتی زبان ءَ گپ جناں۔

راجانی مستریں پجار آئی زبان ءُ کلچر انت ! تہناہ بلوچی پوشاک پر کنگ اُو وت ءَ بلوچ گُشگ بلوچ بوہگ نہ انت بلکہ پہ بلوچ بوہگ ءَ المی انت کہ ما وتی راجی زمہ واری ءَ پورا بکنیں اُو وتی زبان ءُ لبزانک ءَ زندگ بکنیں دانکہ دنیا ما ای باور کنائینگ ءَ سوبمند بہ بیں کے ما زندگیں راج ءِ واہند انت اُو مئے زندگ بوہگ ءِ مستریں نشانی مئے مادری زبان اُو کلچر کنت ۔

ڈاکٹر نسرین شگفتہ زبان ءِ اہمیت ءِ بابت ءَ جاہ ءَ نبشتہ کنت کہ

زبان مانیت گُڈا راج مانیت

دیمروئی کتگیں راج دنیا تہا ہما انت کہ آہاں وتی مادری زبان ءَ علم در برتگ راجی زبان ءَ علم حاصل کنگ ءَ ابید دیمروئی کنگ نہ ممکن انت ہمیں زریعہ انت کہ راج دیمروئی کن انت اُو وتی بنیاد ءَ مضبوط کن انت ! ہمیں سبب انت کہ دنیا تہا جاپان ، جرمنی ، روس ءَ ابید دگہ ملک ءَ ہم وتی مادری زبان ترجیح داتگ انت اُو وتی راج ءِ پہ دیمروئی ہاتر ءَ راہ پچ کُتگ انت۔

دنیا تہا ہر وہد ءَ زور آور ءِ حکمران کہ یک راج ءَ سر ءَ قبضہ کن انت درست ءَ چہ پیسر آئی زبان ءُ کلچر ءَ ہلاس کنگ ءِ جہد ءَ کن انت چوشکہ بلوچ راج یک لگتمال ءِ اُو حاکم ءِ راج ءِ زیردست انت ہمیں ہاتر ءَ مئے زبان ءَ گار بیگواہ کنگ ءِ ہاتر ءَ ہر وڈیں پندل سازگ بوہگ ءَ انت۔ دنیا تہا درستیں ماہرین لسانیات اُو وانندگ ءِ مردمانی ہمیں منگ انت کہ ہر ہما راج ءِ زھگ کہ ہما سرزمین ءِ سر ءَ ودی بیت درست ءَ چہ پیسر آئی وتی راجی زبان واننینگ بہ بیت سائنس ءَ ہم ای گپ ثابت کُتگ کہ زھگ ءَ پہ مادری زبان علم دربرگ یک مزنیں ارزشت ءُ اہمیت داریت ہمیں سبب انت کہ دنیا درستیں راج ءَ وتی ماتی زبان وانینگ بہ بیت بلے مئے بد بہتی انت کہ مارا وتی سرڈگار ءِ سر ءَ ماتیں زبان وانینگ نہ بیت اگاں کس ءِ وتی ماتی زبان ءَ وانگ ءِ ھُب ءُ واھگ ءِ درایت مروچی چاگرد ءِ تہا آئی ءَ یک سکیں نالائق اُو نزانت کار ءِ مردم لیکگ بیت ! راج ہما وہد ءَ دیمروئی کن انت کہ آ راج ءِ وانندگ ءِ مہلوک تہا ای احساس بیت کہ مارا چہ پیم وتی زبان وتی کلچر رکینگ ءِ انت اُو پہ زبان ءِ دیمروئی ہاتر ءَ وتی راجی زمہواری پورا کنگی َانت۔

واجہ ڈاکٹر شاہ محمد مری جاہ ءَ نبشتہ کنت

پانزدہمئ صدی ءَ ما بلوچ لبزانک ءِ راجدپتر ءَ ,, رندی ؛؛ اہد گُشگ بیت ! ای اہد بلوچی زبان ءُ لبزانک ءِ دیمروئی کنوک ءِ اہد نام ءَ زانگ بیت ! ای وہد ءَ نہ تہناہ نوکیں شاعری تخلیق کنگ بوتگ بلکہ مہر ءُ دوستی داستان بہ بنت یہ وت مہ وتی ( قبائلی ) جنگانی سر ءَ نبشتہ کُتگیں شعر بہ بنت بلکہ مزاحمت کنگ ءِ زیبداریں شاعری داستان ہم راجدپتر ءَ است انت ! چاکر ءِ اہد ءَ بلوچی زبان نہ تہناہ یک منیتگ ءِ زبان بوتگ بلکہ دنیا ایندگہ راجانی برابری ! ادبی ءُ دود و ربیدگی اُو سائنسی اظہار مزنیں انداز ہم کُتگ ! راستی ہمیش انت کہ ایندگہ زبانانی پیم ءَ بلوچی زبان یک جوڈ بوتگیں زبان نہ انت کہ چاکر ءُ شے مرید ءَ سر بوتگ بلکہ ہزار ءَ سال چہ گیش تجربہ کنگ ءَ چہ پد یک نسل ءِ چہ دومئی نسل اتکگ ءُ مارا سر بوتگ۔

پانزدہمئ کرن ءَ دنیا ءِ ایندگہ زبانانی برابری کنوک ءِ مئے راجی زبان ابید گیش دیمروئی بکنت آئی ءَ بازی حد ءَ پشت ءَ شُتگ مروچی اہد ءَ وانگجاہ ہم گیش بوتگ انت مئے نوجوان ہم گیش وانندگ انت بلئے مئے راجی زبان ءَ جوانیں رنگ ءَ دیمروئی نکوتگ ہمیں ہبر پدر کنت کہ مروچی وانندگ ءِ ورناہ ءَ وتی راج ءِ زمہواری گیش وتی زاتی پائدگ ءَ ترجیح دئیگ ءَ انت ! ای ہبر مارا درست ءَ زانگ المی انت کہ راج ہما وہد ءَ زندگ بنت کہ آئی ورناہ پیر ءُ کماش پہ زبان ءِ زندگ کنگ ءِ ہاتر ءَ وتی کرد ءَ ادا کن انت ! ای بلوچ ءِ ہر ہما ورناہ ءِ ماس ءُ گہار ءِ زمہواری انت کہ وتی زبان ءِ رکینگ ءِ اُو دیمروئی ہاتر ءَ جہد بکنت ای مئے راجی زمہ واری انت کہ راج چم ءَ ہمیں لوٹ ءَ کنت ۔

ماتی زبان ءِ میان استمانی روچ کل راج ءَ مراد بات

Leave a Reply

Your email address will not be published.