مزہب و سیاست

نوشتہ کار: نیک بلوچ

اینو نا سیاسی جماعتاتا کردار ئے عملی و علمی حوالئٹ مارکسسٹ کردار مروئی ائے مارکسزم کفر ایلو مزہب نا جنگ اف دا جنگ ئے عالمی سامراج تینا مفاد نا خاطر مزہب نا خلاف کننگ ئٹی ائے ۔ اودے کفر ایلو مزہب نا جنگ جوڑ کننگ ءُ۔

خصوصاً پاکستان ٹی اودے کفر و اسلام نا جنگ ئنا پن تننگانے ایلو تننگ ئٹی ءُ تَہ ۔۔مارکسزم پائک ہر اسہ ملک یا ریاست نا تہہ ٹی ودی مروکا چھنا ئے پاڷ ملے ، انت پاسہ دا اسلام نا اصولاتان خلاف ائے؟ مارکسزم پائک کہ ہر چُھنا نا تعلیم نا بندوبست کننگ حکومت نا زیہا فرض ائے انت دا اسلام نا خلاف ائے ؟ مارکسزم پائک کہ ہر باشندہ ئے روزگار تننگ حکومت نا زمہ واری ائے انت دا اسلام نا خلاف ائے ؟ ہر بیمارا انسان نا علاج ومعالجہ حکومت نا زمہ واری ائے انت دا بِہ اسلام نا خلاف ائے ؟؟
ہر خاندان نا رہائش نا بندوبست حکومت نا زمہ ٹی ائے ۔انت دا اسلام نا خلافو ہیت ئسے ؟
مارکسزم سائنس ایلو ہر وڑ نا علم و تعلیم نا ہیت ئے کیک انت دا مزہب نا خلاف ائے ؟
دا حقیقت ائے کہ دنیا ٹی ہمو قوماک بھلّو قوم پاننگرہ ہرا قوم آک علم حاصل کرینُہ ۔اینو ئسکا ہر اسِہ قوم دنیا ٹی مزہب نا حوالئٹ جْوانو قوم ئس یا عظیم و ئس قوم جوڑ متنے، ہرا قوم آک علم و کمال نا بنیاد آ عظیمو قوم پاننگرہ اگہ مزہب ہی انسان تیکن کافی مریسس تو ننا پیغمبر محمد مصطفٰی ﷺ دا فرمائیفتوکہ کہ علم مومن نا گُم مروکو میراث ئسے ۔او فرمائفک کہ علم حاصل کبو خواہ نمے چین ئسکان ہنوئی تمّہ ۔ اونا فرمان صرف علم نا اہمیت ایلو خاصیت ئے سمجھائفنگ نا مکسد اس ۔ اوڑان نن اندازہ خلین کہ علم نن کن اخدر ضروری ائے ، ایلو سیاست نا علم نا پن مارکسزم ائے ۔۔
دا ہیت ئے یات تخرہ کہ مزہب نا تعلق انسان نا تینا ذات اسکان محدود ائے ایلو علم نا تعلق غٹ جہان نا انسانیت تون وابستہ ائے۔
اسہ انسان ئسینا نماز آک ، روچہ آک نیک ئنگا کاریمک اونا کل اعمال آک اونا تینا ذات ئکن ءُ، اونا نیکیک پین کس ئے کاریم تفسہ۔
ہراڑیسکان علم نا تعلق اے علم تقسیم مریک مخلوق ئٹ بشخینگ مریک ۔
ہمر کہ عبادت و ثواب آک ایلو مخلوق تون بشخنگ مفسہ اونا نیک ئنگا عمل آک پین انسان ئسے نا بشخ ئٹ مننگ کپسہ ۔
مگہ علم ہمو دولت ائے ہرادے نی غٹ جہان نا مخلوق ئٹ بشخنگ کیسہ، تننگ کیسہ۔

مزہب نا ہرگز ہرگز انسان نا معاشی معاملات تون ہچو جنگ ئس اف دا جنگ یا جھیڑہ ئے شاغنگ ئٹی ءُ ۔
دنیا ٹی ہرا طاقت ایلو ہرا گروہ ہرا جماعت ہرا پارٹی ہرا انسانک مزہب نا پن آ اقتدار حاصل کننگ خواہیرہ
ہرافتون مخلوق نا فلاح و بہبود کن ہچو سامان مفک ۔ مثال اسہ بادشاہ سیتون خلقتِ خدا کن طعام و روزگار نا ہچو بندوبست مفک ۔اونا ہرگز دا زمہ واری اف کہ او مخلوق نا تعلیم حاصل کننگ کِہ ادارہ یا عدل و انصاف کن عدالت جوڑ کے ۔

ہنوکا وختاتیٹ بادشاہ نا ذات عدل و انصاف نا زمہ وار مریک ۔بادشاہ ہی منصب ایلو بادشاہ ہی عدالت مریک ولے داسا عوام ایلو مخلوق نا کاریم دا جوڑ مسّنے کہ نواب ءُ سردار نا ہر ظلم آ کاٹم ئے شیف کرسا زندگی ئے گدریفرہ بلکہ لنگڑی بے وسی نت شپادی ئٹ ہم نواب یا سردار کن دعا کیرہ اے اللہ ننا سردار ئے زندگی تیس تاکہ ننے و ننا بروکا مخلوق نا استحصال کرسہ کائے ہمر کہ بلوچستا ن ٹی نواب ،سردار ، میر و ٹکری مخلوق نا استحصال کننگ ءُ ۔
ہندا حساب آ مزہبی طاقت آک ، ملاک ، ایلو پنڈت آ تا اقتدار صرف مزہبی رسم ایلو دعا نا اقتدار مریک ۔
دا اقتدار مخلوق ئے روزگار یا اِرغ تننگ نا اقتدار اف ۔

انسانیت یا بنی نوع انسان صدی تا ہندا کھور ئنگا طاقت تا ایلو غیر انسانی رویہ غاتا ظلم و جبر نا مقابلہ کرسہ بریک، اینو انسانک جمہوری سیاسی نظام ئے سر مسنُہ اینو مارکسزم نا انقلابی سیاست ئے پوہ مسّنُہ اینو با شعورا انسانک تینا زیہا مروکا ظلم ئنا خلاف آواز ہفرہ ۔

اینو بلوچستان ٹی فرسودہ نظام ئے برقرار تخنگ نا کوشست مننگ ئٹی اے، داسا بلوچ دا نظام آن جْوان سرپند ائے داسا بلوچ نا جوان ریاست ، پنڈت ،پادری ایلو ملا تا چم آتِہ سرپند مسّنے ، داسا ظالم نا دیک ایسری نا کنڈا ہنساٹُہ ۔۔
اے وخت ئسکان بلوچ قوم ئنا سامراجی و نوآبادیاتی زمزیراتان نجات سہی وڑٹ مننگ کپّک ہراتم ئسکان کہ بلوچستان ٹی سیاسی آگاہی و سماجی شعور نا بنیادا ہرہر ورنا ئے بیدار کروئی متنے ، انتئے کہ بلوچستان ٹی فرسودہ و جاگیرداری روایتاتِہ سانبھوکا طاقتاک خْواہیپسہ کہ پوسکنا نظریہ غاک اوفتا جہا بریر، ولے سائنس علم و جدوجہد نا کسر تینکِہ لازمی اسہ منزل ئس کشّو ہراڑے دا کشت وخون، جبری گمشدگی و ظلماک مروفس ۔

Leave a Reply

Your email address will not be published.