آزمانک : توائِف (prostitute)

نوشتہ : سلیمان لائک

براہوی بدل: ریاز آلَم بلوچ

مکان نا مالک کنے مُرغنو برانڈہ سینا کُنڈا گُڈیکو کمرہ غا درے دا اسہ چُھنکو ولے بھاز بُڑز شان ئُہ زیبا ءُ کوٹھیس اس _ ہرا نا دریچہ غا تا خِیسُنو رنگ ئنا اُشکنو پردہ خلوک اس کمرہ نا اسہ پارہ غان اسہ الماری سیٹی گِڑاس مجسمہ ،گُل دان ئُہ گڑاس گھڑی تخوک اسُر _ الماری نا خُش آن اسہ پینٹنگ ئس ٹنگوک اس ہرا ٹی اسہ چُھناس کھٹ ئسے آ تولوک مُتکنو ہَرنگوکو پُچ منٹ بیناسس رہی آ تا گلیل ئس تخوک اس نَتّا تہ تلفاک خواری آن پُھوتڑوک ہلوک اسُر _اسہ ہزگار، دولت مندو اُرا سیٹی دا جنسار(تصویر) اجیب خنِنگاکَہ دُہنکہ اسہ بخال ئسے نا اُرا ٹی کُران شریف نزر برے

اِی ساہتس سوچ کریٹ کہ دا جنسار ارا غربت، افلاس نا ترجمانی ئے کیک دا دولت مندا اُرا ٹی دا نا خلنگ نا انت مسخت ؟ _

اِی اَسی ہندا پینٹنگ ٹی آختہ اَسُٹ کہ کنا نزَر کُوٹھی نا کُنڈا اسہ زیباؤ ہسین جمال ءُ زال ئسے آ تما ہرا گول میز آن خُڑک تولوک اس کنا داڑے ساڑی مننگ نا او ہِچ پام کتّویسس اِی اودے سلام کریٹ واہم او کنے آ توجہ تِتو او کنا سلام نا ورندی (جواب) ئے تینا سَرغ نا سُرفنگ ئٹ تِس ای اوڑان خُڑک ہِناٹ اوڑتون مون پہ مون توسُٹ اونا خنک کُڑمبی ئَٹ بے تُغی نا اہوال تِسّرہ _ مُرغنا یلہ غا پُژہ غاک تہ اونا پیہُنا کھمیس نا زِنچک آتِہ سر مسُرہ ہندُن لگا کہ اسہ کُڑمبو دڑد رنج ئس اودے پلویڑ کرینے اونا چہرہ غا بیماری ئُہ مایوسی نا دھبہ غاک ہندا زاہر کریرہ دُہنکہ کہ اسہ گلاب نا پھل ئس خاخر نا زراب آتان کھیب مرے__

کنا زہن ئٹی سوج (سوال) آتا اسہ کھوڑ ئس ودی مس اِی تینا شیتانی خیالاتِہ اسی مُر کرسّہ اوڑتون ہمدردی زاہر کریٹ ۔

اوڑان سوج کریٹ

“نی دیر اُس ایڑ ؟”_

“اِی __اِی “

او تینا بارُنا جوڑ تیا اسہ خرینو بشخندہ ئس تالان کرے وٙ دُو ئے تینا مُرغُن کرسہ ٹیبل آن جام نا پیالہ ئس ہفّے وٙ اسہ دم آ کٙھش کرے ولدا ورندی تِس

“اِی نُما جنسی اُست پوروی (جنسی تسکین) نا خاتِر اسہ دُھتک ئسے اُٹ ،اسہ بدنام ،بے بنیات ،بے اُرا وٙ بےبس ءُ نیاڑی سے اُٹ “_

اونا خن تیان خڑینکاک چُھلک ہلسہ کلک آ تیان تہ ریڑ کرسہ خُمب ئٹی تمار _

او تینا کُڑسی ئے ہڑسیسہ اِرٹمیکو جام ئے ہم پُھر کرے جھٹ ئسے نا چُپی آن پد او کڑسی آن بش مس اسہ گنوکو نیاڑی سینا وڑ بُڑز توار ئٹ وٙسان ہکل کرسّہ پارے:

“اِی اسہ توائِف ئسے اُٹ ،بے لج بے میار ، پیسہ نا خاتِر ہر جاگہ غا گھوئی کیوہ ،ہر کاریم ئے کیوہ “__

“مگر آہ خدا وند ای اخس دمدرینگانُٹ کنے اخس ترندو تُغس ہلنگ ئٹی اے دا پیسہ نا رند ئٹ اِی چھار دے نا ئے تُغ کتّنُٹ “_

اوکان گُڈ او پین ہِچ ہیت کتوْ اونا چہرہ خڑینک آ تیان پالُن مس او اسہ پین جام ئس پُھر کرے او نا خن تان وہوکا خڑینکاک ٹپ ٹپ کرسہ گلاس ئٹی تمارہ او نا غمک رنج پُھڑینک مرسہ شراب نا زہرا تیٹ اوڑدہ مرسہ اسُر او انسان تا خلوک اسہ بندغ ئسے نا رُسوائی ئُہ جنون نا ندارہ ئے پیش کریکہ __

ساہتس ئسے آن پد اونا جوڑک ولدا لڑزنگ ئے شُرو کریر شائست اینو او تینا اُست ئنا لہر ئے شولنگ خواہاکہ
ہیت ئے مُرغُن کرسہ پارے:

” بے تُغی ئہ خمار کنے تینا گرفت ٹی ہلکنے ،کنے بے اِزت ئُہ رسوا کرینے_ ولے داکان بِیدِس ہم ای رسوا کننگانُٹ داسا کنا خُڑکا اِزت ئُہ میار نا ہُچو کٙدر ئس سلتنے ہرانا ای رکھ (دفاع) ئے کیوْگچینا لغام ئُہ پوسکنا زمزیر بینوک اِی دا بیش تا واڑ ئٹی پِیہانُٹ ہراٹی کنا اِزت ئُہ میار بچنگ کننگ کپسہ_ ہرا گڑا ئے کنے رکھوئی اس اودے اِی بچفنگ کننگ کتوْٹ کنا کُھل بُھمبیر (تباہ) مسُر کنا اِزت ئُہ لج بومبار (گُم) مسر ای توائف ئسے اُٹ بدنامو زال ئسے اُٹ_ اسہ مونو داغ ئسے اُٹ ہرا پِیہُنا پُچ آتا لگے تو او پُچ ہم داغ دار مرے “_

او تینا اُشکنا موننگا پُژہ غاتِہ ‘ تینا پیشانی آن مُر کرسہ کنے آن سوج کرے کہ:

“نے اٙولاد ارے؟”__

ای ” ہاں ” ٹی ورندی تِسٹ

“نی تینا چُھناتِہ دوست تخسہ؟”

“ہاں دا تو فتری ءُ ہیت ئسے ئُہ کنا فڑز ہم ارے کہ تینا چُھناتِہ دوست تِخو”

اسہ وار ولدا اونا خن تان خڑینکا تا جھل ئس روان مس

او تلوسہ ئے شرو کرے ہچکی ہلسہ اسہ بھلو آڑسندہ ئس کشا پدا چیہانٹ ئس خلک

” ہائے اللہ ! کنا یوسف کنکن اخس ہوغوک مرو خدا یا اگہ او بیمار مستو ای امر کروٹ اِی اودے خاچوک اِلاٹ بسُٹ کئی دے تان اونا ہِچ خیر خبر ہلتنُٹ_

بھاز ہُریسکان ہوغنگ آن پد او تینا مونے کنے آ ہڑسا

“مگہ نُم نرینہ غاک انت چابو چُھنا تون مہر انت گِڑا سے نُم باوہ اُرے لُمہ افیرے لُمہ نا چُھنا تون ہرا مہر ئُہ دڑد مریک اودے باوہ پُہہ مفک ۔ نُم چُھنا ئے ہُڑفنگ کپیرے نُم تینا دُو آ خاچفوک چُھنانا خرارہ آتِہ بنتنرے دا توار تِہ نِلا (صرف) لُمہ غاک بنرہ نُما خڑینکاک وختس ہم چُھنا نا خڑینکا تون اوار متنُہ چُھنا اگہ نَن نیمہ غا سما کے ہوغِہ تو نُم سوختہ مریرے لُمہ تینا تُغ ئے گیرام کرسہ چُھنا ئے لولی تیک خاچفک _
چُھنا اگہ خَر کے تینا مونے دیوال آ تے ہموڑے تُنگان کائِہ تو نُمے اٹکل ارے او وخت آ لُمہ نا اُست امہ خاخر آن با لہر کیک
؟

“اُف کنا اللہ ! کنا یوسف کنکن اخس تلوسہ مروئے _ اودے دیر نُواروئے _ ہراتم او تُغ آن سما کرو کنے تینا رہی آ خنوف ہمسایہ نا اُرائی اودے امر خاموش کروئے؟

“اوہ اللہ جان ! اِی دنیا ٹی امرو بد بخت ئسے اُٹ دا خلکت ئے برداشت کننگ ئٹی اُٹ _ نی کنے انتئے ودی کریس ؟ کنے زیباؤ نیاڑیس پیدا کریس پدا کزیت (کھینگ) نا در ئے بند کریس_؟
نی کنے خٹونک (کرگز) ئُہ خرما تا سیل ئہ سواد (تفریح) نا وسیلہ جوڑ کریس

“ہائے بے سما آ اَہمد (نیاڑی نا اُرا خواجہ) داسا تینا خن تِہ مَل ہُر نا وتن نا بندغاک نا زائیفہ تون انت کننگ ئٹی ءُ نی دا رَستر (وحشی) تان ایلمی نا اُومیت ئے تخاس نی ہندافتیکہ ننے تہارمہ غا نن تیٹ ڈُکھ آ تا ہوالہ کریس _ ای نیتون امر سختو زندگیس تدیفیٹ وَ نی بے مسخت کزیت کریس _ نا راج دوستی(حب الوطنی) نا سِلہ نا پد نا مِہروک (محبوبہ) ئے نا وتن نا خرما تا دوٹی سر مسّنے نا مہسوما چُھنا یوسف ہمسایہ نا رہم ئہ کرم ئُہ خیرات نا ہوالہ مسّنے
نا زائیفہ ڈنّ آ پیشتمانے ئُہ نا وتن نا لَج، میار وَ شرافت نا آزمائشت (امتحان) ئے ہلنگ ئٹی اے

اہمد جان ! نی ہَر خرما ئُہ ڈھونڈ خور ئے لُمہ وتن نا چُھنا ساراس ئُہ ایسری (آخر) اِسکان ہم اوفتِہ پُہہ متویس کہ تیڷ ، تیڷ مریک_

نی زیباغا ڈیھ ئنا پُھلا تیٹ ئُہ پِتا تیٹ فرخ تِتّویس وَ خرما ئہ خرما نا چُھنا تیٹ فرخ کشّیتویس_

“آیا ہمو جنوزان آ تا اِزت آک لُٹنگار ہرا ویتنام نا آجوئی نا جنگ ئٹی کُربان مسُر __؟”

“آیا کیوبا نا یتیما چُھناک تینا باوہ نا خلنگ آن پد توائف جوڑ مسُر__؟”

“نہ نہ ! وختس ہم متوس خواری کش سماج نا جنوزانک ئہ چھوریک وختس ہم سودا مروکو راج ئسے نا جنوزان تان با بے یار، بے مدتگار رہینگپسہ__”

Leave a Reply

Your email address will not be published.