گْوا ننے زندگی نا ہک ہم مف
وہید انجمؔ
تینکہ دنیاس نن ودی کپّن
بش مفن تینکہ روشنی کپّن
روشنی تون دولخی کپّن
زلم ئنا مہن آ بادوی کپّن
بیوس آتون سنگتی کپّن
نن ودی تینْٹی بندغی کپّن
دڑد آ بندغ نا شائری کپّن
زالم آتون دشمنی کپّن
نت شپاداتّو دلبری کپّن
زلم ئنا دُو ئے نن پدی کپّن
گْوا ننے زندگی نا ہک ہم مف
گْوا ننے آن بارو بدبخت اف
غمک خازہ مریر نن چُپ کین
ساہ ئے زور ئٹ ہلیر نن چپ کین
دمک خسکی خلیر نن چپ کین
خنک ہڑدے شلیر نن چپ کین
گُھوگُھو ئے زندہ دیر نن چپ کین
جِھرکی، بلبل شہیر نن چپ کین
سیسو، بڈّو لہیر نن چپ کین
ہوغہ ہُم تو کلیر نن چپ کین
ویل بھلّو ہتیر نن چپ کین
دھرتی ئے تِین کیر نن چپ کین
گْوا ننے زندگی نا ہک ہم مف
گْوا ننے آن بارو بدبخت اف
دوشہ ئے تینا دوست ئہ سنگت پان
دوست ئہ سنگت نا پنت ئے تہمت پان
کس نا مجبوری ئے بِہ تاغت پان
تینا ہکّ ئے بِہ پینّ نا منّت پان
کِٹّا اوندھائی ئے بِہ بلفت پان
ُلُٹ ئہ پل نا ہساب ئے دولت پان
غاو ئنا زیہا غاو ئے سَنّت پان
راج ئنا خیرخواہ ئے بےست پان
بےمرادی ئے تینا مکست پان
لنگڑی ، بینگنی ئے کسمت پان
گْوا ننے زندگی نا ہک ہم مف
گْوا ننے آن بارو بدبخت اف
تینے نن بےسمائی ٹی گوئین
رمب ئٹی تینا تینے نن کھٹّین
تینے ایلو نا لشکر ئٹ پٹّین
بیرہ پِٹّنگ ئہ ماتم ئٹ لگّین
تینے دشمن تَہ چر ئٹی ملّین
تان ئنا نن غلامی ئے خْواہین
دُو ٹی ایلو نا ڈیھ ئے تینا تین
تینا غمخْوار آ خن تِہ خیسن کین
نن اگہ دے ئے پھینڈی ئٹ ڈھکّین
راستی آن مہن ئے نن ہڑسین
گْوا ننے زندگی نا ہک ہم مف
گْوا ننے آن بارو بدبخت اف
تینا لمہ وتن نا ہچ غم مف
خرّن ئنگا چمن نا ہچ غم مف
دانا کوہ ئہ دمن نا ہچ غم مف
دانا مُستی، جمن نا ہچ غم مف
دانا مہر ئہ امن نا ہچ غم مف
دانا ٹھپّا بدن نا ہچ غم مف
تینا جنت، ادن نا ہچ غم مف
انتئے مہنی بفن نا ہچ غم مف
مئین یا کہ مفن نا ہچ غم مف
کاٹم آ گر کفن نا ہچ غم مف
گْوا ننے زندگی نا ہک ہم مف
گْوا ننے آن بارو بدبخت اف
