آجوئی انت ئسے ؟
وہید انجمؔ
بندغی نا شرف دادے کہ اودے ہر وڑ نا مہکومی، غلامی ئہ کوزہ نا زمزیر تان آجو کننگِہ، انت کس ہمر تینکہ آجوئی خْواہیک ہموہن مئہ ایلوڑکِہ خواہیک اگہ خْواہیپک تو سوج (سوال) دادے انتئے ؟ داڑے دا سوج بش مریک کہ آجوئی انت ئسے؟ آیا دا بندغ نا بِیرہ زہنی خاکہ سے مادی دنیا ٹی دانا ہِچ وجود اف یا دا بندغ نا وے پورو ءُ ارمان ئسے ؟ اگہ دنیا ٹی آجوئی بیرکا مجرّدو لوز ئس پاننگِہ، گُڑا تو دا لڑ ئٹی ایلو تصوراک ہم بریرہ دہنکہ: جْوانی، گَندئی، چائنداری، زیبائی؛ انت داہم مادی دنیا غان پیشَنو گِڑا ءُ ؟
بندغ نا زند ئنا ہمو وڑ ہراٹی او آزات سوچ کننگ کے، سوال ہفّنگ کے، اونا راستَنگا زہنی ئُہ مادی ہک آتا پین کسّ ئس زور آوری ئٹ بھلنی کپ، اودے انسانیت نا شرف آن کس بِٹپ تو اونا زند مہکومی آن آجو اے ۔ سامراجی بیانیہ ٹی آجوئی نا ہک ئے مننگ نا ہیت تو مریک ولے سامراج تینا دہشتگردی ئے تالان کننگ ئے ہم دنیا نا آزاتی نا خْواست ئس پہہ مریک ۔ پاننگ یا لکھنگ نا کچ ئسکان تو کوزہ گیر تبکہ آجوئی نا ہک ئے منّیک ولے ہرا وخت آ مہکوم تینا نتّ آ سلک تینا آزاتی نا توار ئے خلیک تو سامراج اودے ہر وڑ ئٹ شیف بِٹنگ نا کوشست کیک ۔ داڑے دا سوج ہم ودی مننگ کیک کہ ہاکم ہم انسانی آجوئی نا ہک ئے منیک ہندن مہکوم ہم منّیک واہم مہکوم، مہکوم اے ہاکم، ہاکم اے ۔ انت ہاکم نا آزاتی نا تصور جتا اے ءُ مہکوم نا جتا اے ؟ انت ہاکم نا راستی (سچائی) ئُہ مہکوم نا راستی (سچائی) جتا ءُ ؟ نہ کہ بِیرہ تومکاتا آزاتی نا تصوراک جتا ءُ بلکہ اسہ وخت آ ہڑتوماک درست ہم افّس ، مہکوم نا آجوئی نا تصور درست اے ئُہ سامراج نا تصور درست اف ۔ مہکومیت تینٹ ہاکمیت آ دلالت کیک ، سامراجی آزاتی نا تصور مہکوم جوڑ کیک ولدا آزاتی نا لالیچ ئٹ تینا مفاد ئے ازیز تخک ، دا کچ ئسکان کہ اِنساف نا زیہا سرمایہ کاری کیک ئُہ اودے بہا کیک ۔
کائنات نا دا بشخ (زمین) ہم ایلو بشخاتان سرجم جتا اف ئُہ کُل بدل مننگ (حرکت) نا کانود ئٹی تفوک ءُ ، بندغ ہم کائناتی وجود نا شیف ئہ بُڑزی تا یام ئٹی اے۔ بھازاک دا پارہ کہ انسان زمین چھنڈ، گِروک، توفان، آتش فشاں ئُہ وبا تان آجو مننگ کپک تو نن امر اودے آجوئی نا توار آ ہتین ۔ راستیکا دا ہیت آزاتی نا بارت ئٹ پورو افک ئُہ ہاکمانہ ءُ دلیل ئسے انتئے کہ مہکوم تینٹ آجوئی نا تصور ئے بنیاتی ہوالہ ئٹ اوہن پاپک ہمر سامراجی زہن اونا وکالت ئے کیک، اونا آجوئی نا تصور بندغ نا زُلم ئُہ لُٹ ئَہ پُل آن بندغ ئے بری کننگ تو تفوک مریک ۔ کائناتی کانوداتا کُنڈان ہرا نسخان یا ہرا پابندیک مہن آ بریرہ بھاز وخت او ہم انسان نا مداخلت ئُہ مادی سرگرمی تا نتیجہ مریرہ، اوفت آن آگاہ مرسّہ ہم انسان ہندنو کاریم کیک ہرافت آن کائناتی کانوداتا ردعمل اودے ازاب ئٹی شاغک، (داڑے خواہش، ہوس، لٹ ئَہ پُل سرگرم مریرہ) ۔ ایلو داکہ کائناتی کانوداتا تینا سفر ئس ہم ارے اگہ اوٹی استار تا پِنّنگ ، رخت آتا بارنگ، ایلو سہدار تا غِزائی زمزیر نا گْواچی مننگ ارے تو ہندن انسان ہم دا کانود آن پیشن اف ، ئُہ بندغ نا جہد ہم کائناتی کانوداتّو ہم آہنگ مننگ کِن برجا اے ہرا کچ ئسکا انسان کائنات نا ویدن (راز) آتِہ پُہہ مسّنے، او سما (شعور) ہم انسانیت نا ہک ئٹی ہتنگپَک، اگہ ہتنگِہ تو بندغ نا لس زند ئٹی بھلّو جست ئس بننگ کیک ۔
آجوئی نا خْیال ئے کیئیک خْواہشاتِہ چُھٹّفنگ، دنیا نا زندگی آن مُر مننگ، ویرانی تیٹ رہینگ، تپسیا اختیار کننگ ئٹی پٹّیرہ، بھازاک دادے داڑے وے مِلّوکو گِڑاس پارہ ۔ اولیکو ہیت دادے کہ دنیا نا گیشتر تاریخ ہندا پائک کہ بھازا مہکوم راجاک ہرافتا ڈغار، وسائل ئُہ دود آ پین ہاکم ئس بھلُنی کرینے تو او تینا آجوئی نا مزاہمت ئٹ تینے زندہ تخانُہ، ئُہ آجو مسّنُہ نشان بِہ تسّنُہ ۔ ارٹمیکو ہیت دا کہ دا وڑ نا خیالاتا پد ئٹی مادہ نا بدلینگ نا وے پُہی اے ئُہ ہر دور ئنا پیداواری ساخت نا وے چائنگی اے ۔ سوج دادے کہ اگہ مہکوم دا وڑ نا آزاتی نا کُنڈا کائک یا آجوئی ئے ممکن پہہ مفک گُڑا دا گِڑا ئے ہم امر گیرام کے کہ اسہ وخت ئسیٹ بندغ گِروک آتان ، خاخر تان، خل تان ہم بےکچ خُلیسکہ ئُہ تینے اوفتا خُلیس آن آجو کننگ کتّوکہ بیوس سلیسکہ، ولے سما (شعور) نا کُڑمبی تیٹ ہنسّا دور ئس بندغ دافت آن تینے آجو کرے و ایلو ویلاتّو مہن تننگ کِن پیشتما ۔ ہندن نوآبادیاتی دور ئٹی بھازا راجاک غلامی نا خلاف جہد کرسہ تینے آجو کرینُہ ئہ اینو ئسکان ہم دا سفر برجا اے ۔ اسٹ مریک کائناتی ارتقا ٹی راجاتا، زبان تا ئُہ دود آتا تینا دْروشم ئے گوئینگ، چُھٹّینگ دہن کہ کیئی راجاک ، زبانک دوداک وختس اس اسّر داسا افّس ۔ ولے زندہ سلوکا راج، زبان ئُہ دود آتا زورآوری مس تو داڑے آجوئی نا توار نا بش مننگ لازمی سلک ۔
آجوئی نا سوچ دا گِڑا غان ہم خُڑک اے کہ بندغ فطرت نا اخس در تبدیلی تان واخب مننگ ئٹی اے ئُہ اونا تہہ ٹی روان آ ساز آتان اخس ئے بندغی نا ڈکھ ئے مُر کننگ کِن چھیڑنگ نا وس تخک ۔ آزاتی نا تصور نا زیہا کوزہ گیر (آزاتی ئے پُھلوکا) نا خْواہش مریک کہ اودے تینا مغدار آ بیان کیو ئُہ زیردست آ ہندا سامراجی آزاتی نا گمان ئے غالب کیو، ہراڑکہ او اِلمی پِڑ آ پوسکنُو پوسکُنو خْیال مہن آ ہتیک ولے او سوچ ئنا بُڑزی تان مُر اسہ گولو لِکیر ئسے ٹی چرّینگرہ ۔ لُٹ ئہ پُل نا پروگرام ٹی آجوئی نا ادراک ئے مُجی کننگ نا ہم کوشست کننگک ، ہراڑکہ مہکوم نا ہِس (حس) آتِہ بناوٹی دنیا تو ملّفنگک تاکہ او ہندا ادراک آن گِدرینگسہ غلامو وجود ئس جوڑ مرے ۔
بندغ ئے آجوئی نا ہک ئے تننگ نا زیہا بھلّو بھلّو کانود پیش کننگانے ، جہانی ادالت جوڑ کننگانے ولے بندغی نا بھلّا کچ مہکومی نا زند ئے گدریفنگ ئٹی اے ، انت بندغ جبلت نا بنیاد آ دڑدخور اف؟ اگہ ہئو تو گُڑا آجوئی نا ہک ئے پُھلوکا نا خلاف آشوبی (انقلابی) ئُہ آزاتی پسند آتا ئُہ ایلو دنیا نا انسان دوستا تا جہد اَرا جبلت نا پھاشی اے ؟ کوزہ گیر نا تینا مخلوک آن ہم ایلو ئے غلام جوڑ کننگ نا خلاف نفرت کننگک ۔
دا ہیت رد اے کہ انسان فطری وڑ ئٹ لالیچی اے زاتیت پسند اے ۔ ہاں کوزہ گیر تبکہ لالیچی اے ، زاتیت پسند اے (ہرادے نن کُل بندغی پاننگ کپّنہ) ئُہ اونا تشکیل چوکا نظام ہم تاریخی ارتقا ئٹ ہندا رویہ غاتِہ بندغاتیٹ تالان کیک ۔ ایلو سوال دادے کہ اگہ انسان ہمیشہ آن لُٹ ئہ پُل کرسّاٹِے ئُہ مستی ہم ہندن کرو گُڑا دانا خلاف بِہ انسان نا ہی جہد ئنا انت متلب ؟
گپ دادے کہ انسان نا زہنی ئُہ جسمانی ہوالہ ئٹ فطری مننگ تینٹ تبدیلی نا گْواچی مریک ۔ جہانی سماج نا خْواست آتان اسٹ دا مروئی اے کہ مادی وسائل آتا گروہی نا بجائے بندغی نا ہک ئکن جہد مرے، راج آتِہ مہکومی آن آجو کننگ نا جہد کننگِہ۔ دا وڑ نا آشوبی تبدیلی ٹی آجوئی نا ہک، انسانی رویہ ، سیاست ئُہ دود کُل گچینو ڈؤل ئسیٹ مہن آ بَننگ کیرہ، ئُہ بننگ نا مشاہدہ ہم کننگ مریک ۔
دہنو ہم گروہ نزر بریک ہرا تینکہ تو آجوئی نا بھلّو خْواست ئس کیرہ ولے ایلو اوفتا جِند آن ہندا اومیت ئے تخار تو ایلو نا آجوئی نا ہک آن انکار کیرہ ، دا اسہ سامراجیئو سِفت ئسے ، اگہ اسٹ ئے مہکومی آن آجو مننگ نا ہک ارے تو ایلو مہکوم نا ہندا توار آن انکار نا انت جواز اے؟ دا رویہ آجوئی نا فلسفہ غان ہم خلاف اے ۔ آجوئی نا تصور ئے گْونڈ کننگ، تنگ کننگ آ اونا جہد ہم مہدود مریک ، مہدودا جہد نا جہدکار ئٹی شرجاچ (تجزیہ) تنقید ئُہ تخلیق نا کمی مریک، دانا نتیجہ ٹی ہندنو ماہول ئس ودی مریک ہراٹی لس جہدکار کِن آشوبی ئُہ آزاتی نا تخلیقی جہد ئٹی ہم تخلیق آن خلافو سوچ ئس مہن آ بریک، ہراڑے سوال ہفّنگ ، مکالمہ کننگ ولدا ہندا فکر ئے عملی میدان آ ہتنگ نا امکان مفک بلکہ بیرہ زاتی خْواہش چلّیک آجوئی نا آشوبی جہد ئٹی دا وڑ نا رویہ غاک آشوب دشمن مریرہ ۔
آجوئی (مہکومی آن پیشتمنگ) نا سرہال آ مکالمہ غان مُست دا لازمی اے کہ راستی وڑ ئٹ مہکوم نا تینا آجوئی نا خْواستاک انت انت ءُ ؟ انت پین کسّ ئس اوڑکہ آجوئی نا تصور ئس ایجاد کننگ ئٹی تو اف ؟ خْواہشاتا بنیات آ جوڑ مروکا گِڑا ڈغار آ راستینا گِڑا نا بدل مننگ کپّک ۔ آجوئی ئے اونا پراسیس ئٹی ہُننگ نا بجائے خْواہش نا بنیات آ ہُننگ آ ہُروکا و مہکوم نا یام ئٹی بِدَری ودی مریک، مہکوم اوہن مفک ہمر اوڑکہ ایلو سوچیک مہکوم ہموہن مریک ہرا وڑ اوڑکہ ایلو سوچیپَک ۔
دا اسہ بھاز بھلّو ویل ئس جوڑ مریک کہ سوج: آجوئی انت ئسے؟ ئُہ اَرا وڑ نا آجوئی؟ مکالمہ ئُہ پَٹ ئَہ پھول نا پِڑ آ بف بلکہ اسہ نارُستو ئُہ وے چائنگوکو تصور ئس مرے، دا وڑ نا تصور آن آجوئی نا فکر ئُہ عمل چُھنکو کچ ئس کاریم کیرہ، بھازا سطح ئُہ جہت آک ویران رہینگرہ ئُہ آجوئی نا عمل ئے تہہ ٹی نِزور تخرہ۔ آجوئی نا کائناتی تصور آن اودے یکّہ کننگ آن اونا سما (شعور) ہم چُھنَک سلِک دہنَنگا سوچ آشوبی کاروان تا جہد ئٹی سوگوی نا جہا کمزوری ہتیک ۔ مہکوم نا آجو مننگ نا شڑت آتان اسٹ دادے کہ اوڑتو تینا سماج نا سرجمو تجزیہ ئس مرے ، ئُہ دانا بنیاد آ او تینا آزاتی نا پارغا کائِہ، جہانی سماجی تبدیلی ٹی مہکوماتا ہم آجوئی نا سوال آ مختلف ہالتاک بریرہ ، داڑکہ لازمی اے کہ آجوئی نا توار ئے مہکوم آتا مُرمُرَنگا اولس (عوام) ئٹ سر کننگِہ، ئُہ دانا زیہا اسہ رنگ مکالمہ ہم مرے تاکہ عملی میدان آ فکر ئُہ عمل نا سوگوؤ رشتہ ئس جوڑ مرے ، آجوئی نا تصور ئے اونا پراسیس نا تہہ ٹی کُڑمبو نگاہ سیٹ ہُننگ اشد لازمی اے ئُہ اونا بیانیہ ئے فلسفیانہ بنیات آ تالان کننگ، اودے مزید دانشمندی نا تاکت تِننگ اونا سرسوبی اے ۔
