کتاب نا سنگتی
نوشتہ کروک: نیک بلوچ
اینو نا بلوچ سماج ئٹ ہُرِن تو او بَھلُو کچ ئس کتاب آن مُر اے انتئے کہ غلاما قوم ئے سامراج کتاب نا کُنڈان مُر کیک اودے ہَنداخہ در لاچار کیک کہ او تینا پھڈ ئے پُھر کننگ کِن در در کیک، تینا زند ئے ہَندا اومیت آ گِدَریک کہ فلانی کنا باخو نا بندوبست ئے کرو، اونا رند ئٹ جی سائیں ، جی حضوری ٹی وخت گِدریک۔
دا سامراجی، سرمایہ داری، و جاگیرداری نظام ئٹ مظلوم آ قوم ئے کتاب تو دوستی کروئی اے ، کتاب ہمو وسپہ (ذریعہ) اے ہرانا بنیاد آ نی تینا زیہا مروکا ظلم و نا انصافی تِہ اسہ چائندارو بندغ ئسے نا دْروشم ئٹ پُہہ مریسہ ۔
نی ہمو کتاب ئے خْوانے ہرا نا تہہ ئنا انسانیت ئے زاہر کے ہرا نے اسہ ہَندُنو کسر ئسے آ ہتے ہرا نے تینا زند ئٹ اسہ جْوانو پارہ سے آ راہی کے ، نی ہمو کتاب ئے خْوانے ہراڑان نی تینا مخلوق ، تینا سماج، تینا قوم ،ایلو مُچ دُنیا نا مظلوم انسان تیکِن اسہ پوسکُنو فلسفہ، فکر ، سوچ ، و نظریہ ئس ودی کر۔ ہَرا نا دو آن مُچ مخلونک نا زہن تان نفرت، تعصب ، و انسان دشمنی ایسری نا کُنڈا ہِنسہ کار ۔
کتاب نا مطالعہ نا شوق انسان نا زہنی ویل آتِہ مُر کیک داڑتو اوار اوار نا زہنی صحت ئے ہم بھاز بھلو کچ ئس فائدہ رسیفک۔ بلکہ کتاب نا خوانینگ انسانی زہن ئے اسہ گِچینو سوچ ئس تیک، او نا حوصلہ انسان دوستی ئے ہم سوگو کیک ۔
کتاب نا سنگتی نا گِڑاس فائدہ افَسْ، دا بھازا فائدہ آتِہ تِننگ کیک، ہَرافتا سوَب آن لسّو بندغ ئس دنیا غان پُہی مریک، او تینا زہنی دنیا تو اوار تینا جسمانی وجود و مچّا انسانیت نا بارت ئٹ گچینو گمان ئس تخنگ نا لائخ مریک ۔
کتاب دوستا سنگت نا زہن ورنا (جَوان) مریک اونا یاداشت گِچینی نا کُنڈا روان مریک ایلو سرگنوک آ انسان کِن کتاب خواننگ بھاز لازمی اے انتئے کہ سرگنوک (ڈپریسڈ ) آ انسان کتاب خْوانینگ آن تینا سماج ئٹ مروکا ظلم و نا انصافی تہ بھاز جْوانو نظر ئسیٹ ہُنِنگ چائک ، او تینا چائنداری ئٹ تینا زہنی دباؤ ئے کم کیک ۔
