لازمی اے

ناصر عفانؔ

جوڑ منّنگ کہ پِنّنگ لازمی اے
مچٹ ئس تینے سُرفنگ لازمی اے

غیر تِسّک بَروت ئے تاب تینا
کاٹم ئے اونا خلّنگ لازمی اے

بدنگا خن تِتو دشمن ہُرانے
بدنگا خن تِہ تَہ کَشّنگ لازمی اے

ہیت زیہا اگر بسّک وطن نا
اوڑے جوڑاتِہ سُرفنگ لازمی اے

سنگتی نا میار اسکان دھڑِنگ کہ
راز ئٹی رازے اِلّنگ لازمی اے

رہبری نا اسُل ٹکّاس خنپک
مگہ دستار نا پھیڑنگ لازمی اے

تہارمئ ٹی ہِنانے زند مُچّا
روشنائی ٹی ہُنّنگ لازمی اے

آسراتی نا پن اف زندگی یار
خاخر تیٹی سَلنگ لازمی اے