نے انت سما ئے اے یار؟
انت چاسہ وفا ئے یار ؟
ناصر عفان
نا پاڷ کُچک کُنپک
بینگنی ئے او خنپک
او بھوپ نِہالی تا
ریکاتا اسُل خاچپَک۔۔
دا خل تیٹ گنوکا نن
پِھڈّاتِہ تفوکا نن
دڑداتِہ سہوکا نن
پنّاتا ولوکا نن
ہینار ئے خنوکا نن
جوڑاتّو پِروکا نن
مَش تے ٹی سلوکا نن
ایمان ہتوکا نن
دا ہندا سلوکا نن
خیداتیٹ چُھڑوکا نن
ریکاتیٹ ہشوکا نن
تُغ ٹی نا بروکا نن
نے انت سما ئے اے یار ؟
انت چاسہ وفا ئے یار؟
ہرفپہ وطن نا نی
دا کوہ و دمن نا نی
گلزارا چمن نا نی
رنگی آ ادن نا نی
کھپ کھپ آ بدن نا نی
دھرتی آ ، امن نا نی
مجبورا سُخن نا نی
دڑدی ائے خن نا نی
شہیداتا ، کفن نا نی
پھلّاتا دفن نا نی
نے انت سمائے اے یار؟
انت چاسہ وفائے یار؟
دا ایڑ تا ہِکّہ غاتِہ
اُست آن دتّنن نن
شہیداتا قصہ غاتِہ
اُست آن دتّنُن نن
بیوسا لمہ غاتِہ
است آن دتّنُن نن
وخت آن قبلہ غاتِہ
است آن دتّنُن نن
نا دروغ آ وعدہ غاتِہ
است آن دتّنُن نن
زفتنگا لہجہ غاتِہ
است آن دتّنُن نن
دتری آ چہرہ غاتِہ
است آن دتّنُن نن
تمّوکا لاشہ غاتِہ
است آن دتّنُن نن
نے انت سما ئے اے یار؟
انت چاسہ وفا ئے یار ؟
