آشوب ءُ زالبولانی کِرد
نبشتہ کار : نئیم مؔومن
اگاں ما سرجمیں دنیا ءِ راجدپتراں چمشانکے بہ دے ایں مارا راجانی آجوئی ءِ جْھد ءِ توک ءَ زالبولانی بلاھیں کردے گندگ ءَ کیت کہ زالبول راجی جْھد ءَ ھمگرنچ بوتگ ءُ یک وشھالیں بانداتے ءِ ھاترا جْھد اِش کُتگ ۔ ھرچ راجے بہ بیت آ زالبولانی مَدت ءُ ھمکوپگی ءَ ابید ھچبر دیمروئی کُت نہ کنت پرچاکہ زالبول چاگرد ءِ نیم بَھر اِنت ءُ زالبول یک راجے ءِ سْرین ءِ ھَڈّ ءِ داب ءَ اِنت کہ چریشی ابید بنی آدم اُوشتات نہ کنت ءُ ھمے وڑا چاگرد ھم بیدے زالبول ءِ مَدت ءَ ھچبر دیم ءَ شُت نہ کنت۔ وھدے کہ زالبول یک جْھدے ءَ ھوار بوت گُڑا جْھد الّم گُڈی منزل ءَ سوبین بیت۔
آشوبی کاراں ابید مُلکار ( Politician ) ، دانشور ءُ چاگرد ءِ گیشتریں بَھر زالبولانی بارو ءَ ھمے جیڑ اِیت کہ زالبول ءَ را چَہ لوگ ءَ دَرآیگی نہ اِنت ءُ دود ءُ ربیدگانی پابند بُوگی اِنت بلے زالبول ءَ را اے پیم ایردست کنگ ءُ آئی ءِ واھشتانی لَگتمال کنگ ھم شَر نہ اِنت کہ تیوگیں زند ءَ ایردستی ءِ ھساب ءَ بہ گْوزین اِیت۔
ویتنام ءِ راجدپتر ءَ بچار ایں ، ویتنام ءِ سرا پرانس یا امریکہ ءِ زورگری بہ بیت ، اے دوئینانی بگیری ءَ زالبولانی کُمک ءُ جْھد وشیں وڑے ءَ پدّر اِنت کہ آیانی جْھد ءِ بَرکت ءَ مرچی ویتنام یک آزات ءُ وتواجھیں ڈیھے جوڑ بوتگ۔
کُردستان ءِ تہ ءَ کُرد زالبولانی گپ ءَ بہ جَن ایں آ مزنیں کساسے ءَ آزاتی ءِ جْھد ءَ ھوار اَنت ءُ گوں مردینانی ھمراھی ءَ تُپنگ چِست کُتگ راجی جنگ ءَ ھمکوپگ اَنت ءُ کُرد گوریلا جنگ ءَ گوں وشیں وڑے ءَ سر سوج دیگ ءَ اَنت۔
دنیا ءِ تہ ءَ ھمک راجی جْھد ءَ زالبول مزنیں کچّے ءَ گوں آجوئی جْھد ءَ ھمراہ بوتگ اَنت۔ پَلستین ءَ ” لَیلا ھالد ، الجزائر ءَ جمیلہ ، ھندوستان ءَ اندراگاندھی ءُ سونیا گاندھی ، کُردستان ءَ سمیرم ، برما ءَ سان سوچی ، بلوچستان ءَ شھید کریمہ بلوچ ءُ بنگلہ دیش ءَ ھسینہ واجد ” کہ آیاں وتن ءِ ھاترا وتی جان ندر کُتگ اَنت۔ آ مرچیگیں زالبولانی جْھد آجوئی ءَ روکیں کندیل ءِ ھساب ءَ زندگ اَنت۔
کولمبیا ءِ راجدپتر ءِ تہ ءَ آ زمانگ ءَ اسپین ءَ کولمبیا ءِ سرا اُرش کُتگ گُڑا دْرستان چَہ پیسر 1539 ءَ اسپین ءِ بگیری ءَ توار چِست کنوک یک ” گاٹیتانا ” نامیں زالبولے بوتگ کہ راجی جْھد ءَ گوں وتی راج ءَ ھمکوپگی ئِے کُتگ۔
ھمے پیم ءَ اگاں ما امریکہ ءِ گْوست ءَ بہ چار ایں گُڑا آزاتی ءِ جنگ ءَ زالبولانی مزنیں کردے بوتگ ، انچوش کہ ” ایبی گیل ایڈمز” بہ بیت یاکہ ” کیترین ” ، اے ھم زالبول بوتگ اَنت کہ آیاں دژمن ءِ بگیری ءَ سرکشی کُتگ۔
کیوبا ءَ نندوکیں ” ولمالوسیلا ” زالبولے بوتگ کہ راجدپتر ءِ تہ ءَ پیڈرل کاسترو ءُ ڈاکٹر چی گویرا ءِ وڑ ءَ نامے زانگ بیت ءُ زالبولانی چاگرد ءِ توک ءَ اولی آشوبی زالبول بوتگ۔
” بلوچ زالبولانی کِرد”
ھمے وڑ ءَ اگاں ما بلوچستان ءِ تہ ءَ بلوچ راجدپتر ءَ چمشانکے بہ دے ایں مئے بلوچ زالبولانی یک مزنیں کساسے گندگ بیت کہ وتی راجی کِرد ءَ پیلو کنگ ءَ اَنت۔ کُوھنیں راجدپتر ءِ تہ ءَ دادشاہ ءِ گُھار ھاتون بی بی ءُ چاکر ءِ گُھار بانڑی ءُ دگہ بازیں زالبولاں دژمن ءِ بگیری ءَ جنگ کُتگ۔
گْوست ءِ وڑا اَنّیگیں وھد ءَ بلوچ مات ءُ گُھار ھم گوں راجی وتواجھی ءِ جْھد ءَ ھمگرنچ اَنت ءُ ھمک گم ءُ سکّی ءَ گوں وتی راج ءَ ھمراہ اَنت، زورگیر ءِ بگیری ءَ سرکشی ، زھرشانی ءُ روانک ءُ زندمان ءِ پِڑا گوں وتی ھمبلاں ھمکوپگ اَنت۔
لھتیں روچ ءَ پیسر ماں گوادر ءَ بلوچ مات ءُ گّھاراں مزنیں کسّاسے ءَ وتی بُنیاتی ھکّ ءُ زُلم ءُ زُوراکی ءِ بگیری ءَ گوادر ءِ دَگ ءَ روانک کَش اِت ءُ زورگیر ءِ بگیری ءَ توار چِست کُت۔
بلوچستان ءِ مزن شھر شال ءَ بہ چار ئے ھمک روچ بلوچ نودربرانی ناھکی ءِ بگیری ءَ شپ ءُ روچ دَگانی سرا کپتگ ءُ زھرشانی کنگ ءَ اَنت ءُ بلوچ جنین چُکان ءَ چَہ وانگ ءَ زانگ ءِ دور کنگ ءِ پندل سازگ بُوّگ ءَ اِنت۔
اگاں یک ڈیھے ءِ مھلوک آئی ءِ بگیری ءَ دَگانی سرا دَرکپت ءُ زھرشانی ئِے کُت گُڑا چریشی ھمے پدّر بوت کہ آ ڈیھ ءِ ھلاسی ءِ بندات بیتگ نوں پرُشگ ءَ ھم دیر نہ کنت۔
یک ھسابے ءَ بہ چار ئے بلوچ چاگرد ءِ تہ ءَ زالبول ءَ را کرآن ءِ پیم ءَ بستار ءُ ازت دیگ بیت ، گْوست ءِ وھد ءَ ھونی جیڑھانی دیم ءَ زالبول آتکگ اَنت گُڑا ھون ءِ جنگ ھم بکشگ بوتگ۔بلوچ زالبولاں ھم بازیں کدے ءَ پہ وتی راج ءَ جان ندر کُتگ اَنت ۔
چُش کہ مئے گُھار زرینہ مری ھم یک زالبولے اَت کہ راجی آجوئی لوٹ ءِ سَوب ءَ چُنت سال اِنت کہ زورگریں لشکر ءِ زندان ءَ بندیگ اِنت ۔ دومی بانک ھلیمہ بلوچ وھدے یوسُپ جان ءُ زپر جان جنگ ءِ تہ ءَ شھید بنت گُڑا بانک ھلیمہ بلوچ تُپنگ ءَ زور اِیت دژمن ءَ گوں جنگ کنت ءُ گْونڈلیں تیراں وتی سینگ ءَ سمبھین اِیت ءُ دانکہ زند ءِ گُڈی سرا جنگ ءَ برجم دار اِیت ۔
دومی مئے دلیریں گُھار پرزانہ مجید دنیا ءِ تہ ءَ اولی زالبول اَت کہ آئی 2800 کیلومیٹر پیادگ سپر کُت ءُ دژمن ءِ بیھار ءُ ٹکراں ءَ پروش دیاں ءُ دیم پہ منزل ءَ شُت ۔ 2800 کیلومیٹر پیادگ ناکہ ایوک ءَ پہ وتی برات زاکر مجید ءَ بلکیں زندان ءَ بندیگیں ھمک ورناہ ءُ کماش ءِ درد ءُ بلوچستان زُلم ءُ زُوراکی ءَ آئی ءَ اے کار پرماتگ اَت۔ آئی ھمک مات ءِ پُرشتگیں دل ءِ درد مار اِت ءُ وتی کاروان ءِ سروک بوت۔
شھید بانک کریمہ بلوچ ءَ بلوچ راجدپتر ءِ تہ ءَ یک نوکیں آشوبے زندگ کُت ءُ اے گرانیں دور ءُ باریگ ءِ آ ھر وھد ءَ دژمن ءِ بگیری ءَ پہ وتی بزگیں راج ءَ توارے اَت ءُ مرچی آئی نام دژمن ءِ دیم ءَ ھَشیمیں کُوہ ءِ وڑا مِک اِنت ۔ آئی لوٹ ءُ واھگ ھمیش اَت کہ منی بزگیں راج یک وش لذتیں زندے بہ گواز اِیت ءُ یک مھکَم ءُ وتواجھیں راجے بہ بیت۔ راجدوستی ءِ سَوب ءَ مرچی آ ھمک مردم ءِ دل ءَ ھست ءُ زندگ اِنت ۔ زورگر ءَ آئی جند چَہ دنیا ءَ ھلاس کُت بلے آئی نام ءُ جْھد ھر وھد زندگ اَنت دانکہ اے جھان مان اِیت۔
من سلام کناں ھما بلوچ ءِ شیرزالیں ماتاں ءَ کہ آیاں وتی نُگرھیں بچ پہ وتی بزگیں راج ءُ وتن ءِ واست ءَ ندر کنائینتگ اَنت ۔ انچوش کہ شھید ریھان جان ءِ مکھیں مات یاسمین بلوچ کہ وتی تنگْوئیں بچ وت آجوئی ءِ سَپر ءَ دلبَڈی ءُ راہ داتگ کہ اگاں مِر ئے پہ وتی ایردستیں راج ءَ بہ مِر۔
چریشی ابید بلوچستان ءِ ھزاراں شیرزالیں ماتاں وتی پُلگدیں بَچ پہ سرڈگار ءِ ھاترا ندر کُتگ اَنت۔
سد سلام اِنت بلوچستان ءِ ھما دلیر ءُ شیرزالیں مات ءُ گُھاراں ءَ کہ دَرانڈیھی کپتگ ءُ پہ بزگ ءُ درتھ پُچیں راج ءُ بلوچستان ءِ تہ ءَ ناھکی ءِ بگیری ءَ توار چِست کن اَنت۔
