خْیال ئس اس گمنام مسّک

وہید انجم

خْیال ئس اس گمنام مسّک
شام ئس اس گْوربام مسّک
ہفّے لالیچ ئس خرابو
بندغ ئس لیلام مسّک
روغ ئے منّک ،راست ئے منپک
داخدر بے پام مسّک
توس بے خْواجہ تو خْواجہ
ہر گِڑا گیرام مسّک
تمّا سرسوبی نا رند ئٹ
او اخس ناکام مسّک
دوبہ نے آ خلک شارئٹ
دنیا ٹی بدنام مسّک
ہائے نن کن ! ہائے نن کن !
است خْواہی وام مسّک
اِلّا بس او سنگتاتِہ
ولدا بے آرام مسّک
کھئوکا کَھٹّا ، زندہ غانا
زندگی بے تام مسّک
نوشکل ٹی مس اَلی دوستؔ
وڈّھ ئٹی گْوہرامؔ مسّک
ریکیؔ نا شئیرتے کہ خیرات
است ئٹی بشامؔ مسّک
تینے باء ئٹ کس سفا کپ
کسّ آ گر الزام مسّک
بِنگ شیپول ئس ہنینو
نن تو بس ہمگام مسّک
توبے تینا زیب ئے گوئیک
چہرہ غاتَہ رام مسّک
دُو سرفّوئی مفک ہِچ
دُو اگہ ہنّام مسّک
خاخر ئس لگفینے بھلّو
چاوہ اونا شام مسّک
چُک امر انجمؔ مرو خْوش؟
نتّ تیٹی تہ دام مسّک