راجی توار
نوشتہ: شاہجہان بلوچ
نن ہمو بدقسمت آ سماج ئٹی رہینگنہ ہراڑے رُگوئی خَلّنگ ،پُھلنگ، دُزی، بد امنی، پریشانی ئُہ بِھیم (خوف) اوڑے نا باتی تا زند ئنا بشخ جوڑ کننگانے ۔
داڑے لکھنگ، سوچ کننگ, کتاب خوانینگ، ہیت کننگ، سوال ہفنگ راست ئے راست پاننگ گناہ چائنگرہ، سماج ئٹی فکریئو روشنائی کروکا بندغاک گوئنگرہ، خلّنگرہ، گم کننگرہ ۔
بلوچ معاشرہ ٹی روایتی وڑ ئٹ نیاڑی تا شرف ئنا بارٹ دا پاننگک کہ اِرا ٹَک ئہ زات ئنا نیام ئٹی خونیئو جیڑہ ئس مرے، اگہ نیاڑی یام تمّہ تینا گُد ئے مون ٹی تا تالان کے او خونی آ جیڑہ ہم ختم مریک کائک…. تو اینو ہزارا بلوچ فرزنداک لاپتہ ءُ، ایلم تو اوار ننا ایڑک بِہ دُشمن نا زندان ئٹی بند ءُ ۔ اگہ نن خوڑت ہُرن تو بلوچ نیاڑی نا شرف ئے جابر ریاست و فرسودہ قبائلی روایتاک اوڑان پُھلانُہ ۔ بلوچ نیاڑی نا نجات کِن راجی سیاست ئٹی بننگ لازمی اے تاکہ او ظلم ئنا ہر وڑ آن آجو مرے ۔
ننے تو پین ہِچ اف ننا آخریکو سِلا “مُزاہمتیئا توارے ” ….. ننے ہندنو مزاہمتیئو توار ئس درکار اے ہراڑان مشک پنّر چُور چُور مریر کار ۔
داسہ ہمو وخت رسینگانے ہمو “مزاہمتی آ توار “نا خلنگ نا وخت بسّنے ہرا توار آن مشک چُور مریر، سمندر نا چھولاک جوش کیر، تو ببو اسہ ہندنو مزاہمتی او ہکل ئس کین ہراڑان دشمن تا خف تیٹ یلنگارس ودی مرے ۔
دا وخت آ ننا راج مختلف دھڑہ غاتیٹ بشخ کروکے دُشمن ننا نزوری آن فائدہ ہفّسہ ننے جہس زبان نا پِن آ پِرغنگ ئٹی اے جہس فِرقہ واریت جہس ٹَک آ تا نیام ئٹی جھیڑہ ودی کریسہ ننے تین پہ تین ئے آن مُر کننگ ئٹی اے ۔ دانا وجہ بیرہ ہندادے کہ نن تینا اسل مکست آن مُر مرین ئُہ ہنت زلم زوراکیس مرے نن تینا خن ئُہ با تہ موغِن چُپ کین ۔
ہندن آشوبی امام چی گویرا اسہ جاگہ سے آ پائک کہ:
اینو بندغاتِہ کیئی قوم آتیٹ ,زات آتیٹ ئُہ سیاسی و مذہبی فرقہ آ تیٹ ہندا سوَب آن بشخنگانے کہ او نہ ظلم ئہ جبر ئسے نا مون آ بش مریسہ اسٹ مریر، نہ ہی اونا خلاف توار ہفّر ۔
زرورت اینو ہندادے کہ نن اسہ راج ئسینا پِن آ یکجا مرین تینا زاتی بغض ئہ انا ئے اسہ کُنڈ آ کریسہ راجی دْروشم ئٹ تینا دُشمن نا مَکروئا چم آتِہ پُہہ مریسہ اونا مقابل کن سلِن و آشوبی وڑ ئٹ دنیا نا مون آ تینا توار ئے درشان کریسہ مونی دین ۔
