جُہد

وہید انجمؔ

جہد برجا مرے دنیا زیبا مرے
زندگی نا بقا کن مرے
ٹھپّ ئسے نا دوا کِن مرے
جہد تیبہ جہان ئے سرفّک تخک
وخت ئنا مَہری نا جہد رفتار ئے ہم ودّفک
جہد ہڑسیک دنیا ئے، ٹاہیک تَہ
فکر ئے سینگار کیک ہڑدے جوڑیک تَہ
جہد دیدہ سما نا خن ئٹی ٹی مریک
جہد پُھل ئس ارے،
جہد چَوپھیر داڑے پِت ئٹّی مریک
جبر ئنا جھمّر ئٹ مہر ئسے نا گدان آن خُڑک
جہد گِڑگیس ئسے
جہد بندغ نا رنگ آن پُھر
کائنات ئٹ دا تالانو زیباؤ ٹِک ٹِکّیئو ویس ئسے
موت ئنا کوچہ ٹی ناچ کیک
زند ئکن،
زیب ئکن
راستی، آجوئی، سوج، دانائی کِن
بارُنا، باسنا، مُرغنا ریک ئٹی ، سختا ہیناری نا راج ئٹی
نت شپادی، ملاسی نا وخت
جہد تینٹ کپوت ئس مریک
سِدّھا نے آ بریک
جَھل تا ڈسّ ئے ہتیک
جوڑ سنگت مریک
جہد برکت مریک
جہد قسمت مریک