تئ زندگی کنگ _ چی مانا داریت

نبشتانک: واھگ بلوچ

ھر زندگ ایں ساھدار کہ زمین ۓ سرا زندگی کنگ ءَ اِنت آئی ءَ وڈ وڈیں رنگ ءَ وتہ چہ ئے زوراکیں زند ءِ تہا وتا رکینگی اِنت ۔
زندگ بوگ ارزان ایں کار ءِ نہ انت زندگ بوگ ھاترا چم پچی ءَ چہ بگر دانکہ چم بندی ءَ ھر ساھت ءَ وتا رکینگ ءِ جہد آلم انت۔ پشت کپتگیں ساھدار ءَ ئے زمین وتی ھرجاں کنت۔۔ بلئے برے برے زمین انچو زوراک بیت کہ آئی ءَ را پہ وت زورگ ءَ ھم ساڈی نہ بیت

بنی آدم چہ ای دگہ ساھدار آں سیادی نہ کنت آئی ءِ زندگ بوگ ءِ ڈنگ وھد ءُ پاساں گوں وتی تب ءَ مٹ بوان بیتگ

بازیں زانتکارانی گُشگ بیتگ کہ بنی آدم چہ شادوانی یک نسل اِنت کہ آئی ءَ را وتی اکل ءُ زانت ءَ چہ روچ پہ روچ دیمروئی کُتگ ءُ وڈ وڈیں کردگار کتگ. پہ وتی زندمان ئے شرتر گوازینگ ھاترا دائم وھد ءِ گوما دیمروئی تہا بیتگ پمیشکہ چہ وتی سیادی داروکیں ۓ دگر شادواں چہ یک کر بوان بیتگ ءُ وتہ دگہ نام ئے ءُ پچار ئے دیئگ ءَ سوبمند بوتگ

دومی نیمگ ءَ بنی آدم دیمروئی گوما آوار ھما چیز کہ ائی ءِ اکل ءُ گمان ءَ چہ در بیتگ آئی ءَ را یک نا زانت ۓ تاکت یے نام داتگ اِش کہ مُدام وتی ترس ءَ یک نام ئے بدنت ءُ توار بہ جنت ءُ وتی دست نہ رست ایں کاراں بہ ٹہینیت. چہ اشی ءَ بنی آدم ءَ پہ وت وڈ وڈیں ھُدا جوڈ کتگ ھر دؤر ھر اِلاقہ ءُ ھر لشکر ئے ھُُدا وتی گمان ءُ تب ءَ چہ ھڈ داتگاں ءُ نام ئے بکشاتگاں

مرچی بیست ءُ یکمی کرن اِنت بلے انگت ھمے عمل زمین ئے سرا یک نہ یک جاہ ءِ انگت ٹہینگ بوان انت. زمین ئے سر سک مزن ءُ شائگان انت. ایشی ۓ چپ ءُ چاگرد ءَ انگت انچیں بنی آدم است کہ تنی وھدی مذہب ، سیاست ، ریاست، قومیت، ھسپتال ءُ اِلاج ، وانگ جاہ،
ءُ دگہ بازیں ھُنر کہ گواستگیں بنی آدم ٹہینتگ انت وتا سیولائز کنگءِ ھاترا چہ ایشاں زیبہر اَنت ءُ چرے سہولت ایں زندگی بابت ءَ سرپدی ھم نہ دار انت

ءُ دومی نیمگ ءَ ھمے بیست ءُ یکمی کرن تہا انچین انسان زندگی کنگ ءَ آں کہ ءَ سرجمیں دگنیا ءِ ھڈ ءُ جنجال آں سرپدی ءَ وڈے ناں وڈے داریت ءُ مرچیگیں دگنیا کہ وتا گلوبل ولیج گشیت ءُ وتا ھم ھمیش یے بھر ۓ لیکیت ،، بلے انگت انسانی جوڈ کتگیں زندگی ھرزان کنوکیں چیزاں چہ زیبہر اَنت

ۓ زبہری ءِ مستریں سبب آوانی وتی دست نہ رسگ نہ اِنت
آوانی سرا ھوشتاتگیں ھما ٹولی آنی اِنت کہ چہ ھمے بزگیں انسان ، قوم ءُ راج یا کمزوریں مہلوک ئے بزّگی ءَ را وتی لاپ ءِ سیر کنگ ءِ راہ جوڈ کتگ اش

آوان آں ھمے تُرس انت کہ نیزوریں مردم کے گیگ گور بہ بنت گُڈا آوانی واجہی نزور تر اِیت ءُ آواناں کس دپ ءِ جُست نہ کنت

ئے رنگیں ھیل ءُ ھُنر ھر دؤر تہا زوراکیں مردم آں کتگ ، آ ایوک بیتگ یا ٹولی آنی تہا , آوانی کار دومیگ ئے نزور کنگ ءُ آوانی سرا زوراکی، کار بندگ ، ءُ پُلگ وارگ بیتگ

مروچی ھم ھمے پندل ھر چاگرد ئے تہا ٹہینگ بوگ ءَ انت پہ دومیگ ءَ نزور کنگ ھاترا

آواناں ھر وڈیں پندل سازیتگ وتی واجہی پاگ دارگ ءُ مہکم کنگ ھاترا… مذہب بہ بیت شر ، ھُدا ئے تاریپ کنوکیں مذہب ئے سرپد کنوک مُلا بہ بنت شر ، وتی داشتگیں سلاہ بندیں لشکر بہ بیت شر یا تئ
کَش ءُ کر ءِ ھما کماش کہ تئ مستر کستر انت درست پہ تئ نزور کنگ ءُ پروش دیگ ھاترا کار بستگاں

مزہب ءُ ملا پہ ترا تئ عقیدہ ئے نزوری ءِ ترس ءَ مزہب ءَ چہ یک کر بوگ ۓ ترس ءِ بابت ءَ تئ سرا داتگاں

سلاہ بندیں لشکر پہ ترا تُپنگ ئے تُرس دل ءَ ءُ ترا گار ءُ بیگواہ کنگ ءِ ترس دل ءَ دیگ ھاترا تئ رند ءَ داتگ انت

ءُ اگں انگت تو چرے پندل آں سر گوز بہ بئے گُڈا تئ مستر ءُ کستر کماش تئ کس ءُ وارس ۓ جنگ ءُ گار کنگ ۓ ترس ترا دنت ءُ ھر کجاہ وتہ ءُ وتی واجاہی راکینگ ءِ جہد ءَ کنت کہ تئ پروش آئ ءِ واجاہی آ را گیشتر مہکم کنت ءُ تاکت ءِ بکشیت

مروچی انگت ھمے زوراک است انت ایشانی تب ءُ نیت مٹ نہ بیتگ ءُ ناں کہ ایشانی واجہی مہکم دارگ ۓ پندل مٹ بیتگ انت. اگں چیزے مٹ بیتگ گُڈا ءَ بس زوراک ءُ نزور, وھد ءُ چاگرد

مروچی انگت مذہب بس ترا پروش دیگ ۓ یک مہکم ایں سلاہ انت. سلاہ بندیں لشکر ھما ،، مستر ءُ کستر کس ءُ وارس ۓ پندل ھما

تئ زند ، تئ مستر ءُ کستر ، کسءُ وارس ، تئ نزوری ، تئ چاگرد ، تئ مذہب ءُ عقیدہ ، تئ ھُدا

تئ زندگی کنگ __ چی مانا داریت؟؟؟؟؟؟؟؟؟