گْوادر نا پاسوئی

وہید انجمؔ

خْوانینگ نا دے تیٹی سنگتاک ہردے فارغا وخت آ چھاں ئس ہلکرہ ، اینو ہم ہوٹل آ سنگتاتا کچاری لگّوک اس چھاں ئنا ہر گلّو تو اوار ٹوک ٹھکا و مسخرہ نا ہیتاک منّنگ ئٹی اسّہ کہ سنگت منیر پارے کہ نے، سنگت غلام ئے یونیورسٹی نا نیمہ غان خْواہیرہ ، اِشتافی اِشتافی بش مسّن یونیورسٹی کِن مہن کرین کسر ئٹ بیرہ ہندا سوچ دماغ ئٹی اسّک کہ دہن بے وخت ننے انتئے خْواہیفرہ، داسا ئسکان تو خیر اس!

خیر ہِننگ آ خبر تمّا کہ یونیورسٹی تینا پارہ غان وڈھ کیمپس و مین کیمپس اوتھل آن گِڑاس طالب ئے گْوادر “سی پیک ریجنل ڈائلاگ” نا دورہ ئے کرفّک ہرانا لسٹ ئٹی ننا پِنک ہم پیشتمانُہ۔ اِرا لوز اسٹ “گْوادر” دادے تو پہہ مسّن کہ دا بلوچ وطن نا اسہ بشخ ئسے ، ایلو “سی پیک” دادے نن پہہ متون کہ دا انت بلا سے؟ سہب ئنا وختی ای و سنگت غلام بازار کِن راہی مسّن ،یونیورسٹی نا بس وختی آن طالباتے کِن روڈ آ سلوک اس یونیورسٹی نا کنڈان شاہ جی استاد و قاضی صاحب سنگتاتّون اوار اسّر ، بسّ ئٹی لگّان، اڑے! سنگت شرجیل ، سنگت صبور و سنگت احسان تو مہالو آن بَج ئنا سیٹاتا تولوک ءُ ، ننے خنار تو بھلّو مہر ئسیٹ بشخندہ کریر! ہراٹی تینائی و ایلمی نا نشانی اس ۔ بس وڈھ بازار آن پیشتمّا و دراکھالہ ہاسٹل کِن راہی مس انتئے کہ انگلش ڈیپارٹمنٹ و سی ایس ڈیپارٹمنٹ نا سنگتاک سنگت سجاد ، سنگت باسط و سنگت عمر، ہاسٹل آ ننا انتظار ئٹی اسّر، ہراتم ہاسٹل نا سنگتاک لگّار تو بس مین کیمپس اوتھل کِن راہی مس ای و سنگت غلام اوار تولوک کسر ئٹ دراکھالہ نا مش تا ندارہ ئے ہُرانہ و اسٹ ایلو آن داڑے رہینگوکا مخلوق نا بارت ئٹ ، اوفتا زاتا تا بارت ئٹ سوج و ورندی کرسّہ ہِنانہ آخر کار ہیت ہِنا تاریخی سوال آ سلیس “عالمی جنگِ اول” و “عالمی جنگِ دوم” و بلوچستان نا زیہا ہیت ئنا بِنا مس (طالب، طالب ائے) ہندا ہیتاتیٹی ننے سما تمتو کہ بیلہ ایریا ئے امر سر مسّن( ابّیر! گوتم تینا دھیان ئٹی اخس ہِنوک مرو!) نن ہندنا ہُران تو جھاؤ کراس ئے خنان زیبائنگا بیلہ تو امن و مہراتا جاگہ ائے بس ای و سنگت غلام روڈ ئنا خُشتیٹ دیوی نا رختاتِہ و گڑاس سیاسی چم باز و بہامروکا کردارتِہ مُرّ آن ملوک ملوک خنانہ ولے کھیب آن پِتی پِتی اسُّہ، افلاطون نا ہیت اُست آ بسّک کہ نن ہرا جنسار ئے خننگ ئٹی اُن او تو خن تا دھوکہ سے راست دا افّک ، مولا نی بیلہ ئے امان ئٹی تخس!

سفر بیلہ غان مُستی اوتھل نا کنڈا روان ئس اسہ پارغان سنگت غلام بلوچ راج و بلوچستان نا زیہا ظلم و تادی تا تینا ہنینا خیالاتا درشانی ئے کریکہ تو ایلو پارہ غان سنگت صبور دوئے کھاڈی آ تخساسس، شیشہ غان ڈنّ ئے ہُنّنگ ئٹی اس تو ساز و سُر ئتو اوار تمّوک جمالیاتی تب غیر آباد و بُھٹ بُھٹّی آ ڈغار نا مشاہدہ کرسّہ راجیئو دڑد ئسے بھاکُر کریکہ۔ مین کیمپس نا سنگتاک شاید بھلّو کچّ ئس انتظار ئٹی مسّسُر ، بس یونیورسٹی ٹی پیہا تو مین کیمپس نا سنگت نوروز پنجگوری و ایلو سنگتاک لگّار ، داسا ننا منزل گْوادر اس، ہمو گْوادر ہراڑا سامراج نا نظر سخت اے ،ہمو بلوچ گل زمین ہراڑ کن خڑک ئنا کوزہ گیر و راجی غداراک تینا ضمیر و انسانیت ئے بہا کرسّہ سرمایہ داری نا ناجائز و مُڑدارا کاریم تا بنا ئے کرینُہ۔ زیرو پوائنٹ اوتھل آ “پرنسز آف ہوپ” امید نا شہزادی نا پِن ئے خننگ تون اسہ سرجمو مذہبی و روحانی تاریخ ئس مہن آ بس ۔

گْوادر نا پاسو آ ہِننگ ئٹی مین کیمپس نا سنگتاتون، ٹِیپ و تالانا ڈغار و لیاری نا ندارہ ٹی سنگت سجاد نا مسخرہ و شغلاک پین چس کریرہ، سنگت غلام گْوادر نا بارت ئٹ سرہال ئس تخا تو گْوادر نا “گْوات” چھرک و “در” دروازہ و ہمو نیمہ ہراکان چھرک بریک، ہم خیال ئٹی برسّہ کریرہ ۔ گْوادر اُست آ برے ولے ہمّل جیئند اُست آ بف دہن تو مفک ، نن پرتگالی کوزہ گیراتا مہن ٹی بلوچ نرمزار ہمّل نا ہیت ئٹ اسّنہ کہ ہیت پرتگال ، برطانیہ غان یورپی “رینے ساں” نا دور ئٹی عیسائی پادری نا خام خیالی آ سر مس۔

؎ اسیکہ تو ایسر ائے سفر تَہ
خیال راہی مرے ہرائی

کنڈ ملیر آن خڑک دے ئنا اِرغ ئے کُننگ آن پد ، مُستی سفر ٹی نن و ننا ہمسفر سمندر، خیال و فکر ئٹی بیرفوکا سمندر نا چھولاک بلوچی شائری نا “لاڈے لڈے” آ ناچ کریرہ و اُشکُنا بالاد تون تینا زیبائی ئے پھاش کریرہ ، یا او زیبا الّتوس ننے زیبا لگّارہ، دانا فیصلہ ئے نن سارتر و کانٹ آ اِلّینہ، سنگتاک ہنگول و “پرنسز آف ہوپ” نا ڈیہہ ئنا ماحول ٹی ابرمی خاموشی ئے تینا موبائل کشّینگ و جنسار ہلنّگ ئٹ شور ئسیٹ بدل کریر۔ فن و جمال ئے مارشت ئٹی جہہ ایتِہ موبائل ئٹ جنسار و عکس ہلّنگ ئٹ اودے بے زیب کپّہ و تینے اوڑان مُر کپّہ ، جمال نا زان آ تینا کاٹم ئے تخ و اونا خنتیٹی خنتِہ خڷ ایسکان اریس ہُر!
کسر ئٹ ہراتم مَشک بسّر تو آرٹ ئنا پین دنیاس مہن آ بس، جہہ جہہ آ سرکاری بندغاتا پِنک لکّھوک اسُّہ جہہ جہہ آ فوجی چیک پوسٹاک اسّر ،ولے ہموڑے ہم لمہ وطن تو مہر کروکا مستونگ نا شہید سنگت ثناء بلوچ نا پِن ہم لکّھوک خننگاکہ ۔ بھلّا سفر ، دے باسُن سنگتاتان گڑاس تولوک تولوک تُنگان ہنارہ ، تو گڑاس دمدرینگوک خننگارہ ولے زورئٹ تُغ ئے مِڑارہ تینےآ الّیتوسہ کہ دہنو موقع بھاز کم رسینگک کہ اسٹ وطن نا خل ءَ مَش ئے و پٹ ءَ میدان ئے سیل کے۔ امیرنگا ڈغار بلوچستان نا بلوچ راج ئنا اِرا چُھنا خلق آن مچّہ سِستہ ہُچ و میڷ خْوافسہ گْوازی کریرہ دا اِرا مہسوم ئے انت سما کہ ننا اورماڑہ و گْوادر نا زیباغا و سفاغا سمندری ساحلاتِہ دیر دیر تینا بدئنگا نیت آتِتو خراب کنّنگ خْواہیرہ ، شام نماز نا وخت خُڑک بسّس جاگہ ئس مسہ ،چھار بلوچ نیاڑی کُھرس روڈ آن ہیپار کنّنگ ئٹی اسّہ ، خننگ تون ارمان ئسے نا داستان سفا ننے کُنگ کہ اوفتو مسڑکوس اس ہرا متکنو بلوچی جوڑاس لخ ٹی کریسس و میڷ تا رَند ئٹ نت شپاد روڈ آن ہیپار منّنگ ئٹی اس ۔ ہیلی کاپٹر ٹی سفر کروکا و پوسکنا گاڑی تیٹی شیفی بُڑزائی رُمب کروکا سرکاری نوکر و سردار ، میر اورماڑہ نا نت شپادا دا ایڑ ئنا نت شپادی ئے انت چاؤ و اونا غم ئے امر کُنو ؟ غم کُننگ و اُست خْواہی نا جوزہ ئے دافتان دافتا پارلیمانی سیاست پُھلانے، بیرہ تینا سرمایہ ئے ودّفنگ و غلامی ٹی پِن کھٹّینگ نا دنیا ٹی رہینگرہ ۔

شام نماز خْوانینگ آن پد استاد شاہ جی ولّا اورماڑہ نا نیمہ غا ہفّے ننے، شام ئنا سرمئی و پُھدینا موسم ٹی غم و دکھ والا شائری نا خفا تمّنگ بھلّو نعمت ئسے ، داٹی چُپ رہینگنگ نا پین توار و چاشنی سے ، ہندن کہ رجنیش اوشو نا خُڑکا ننا ذات ئٹی موسیقی نا دنیاس ارے، اودے پیدا کروئی تمپک، بس اودے بِننگ کِن خاموش مروئی تمّک ۔ اورماڑہ بلوچی زبان نا پِنیئا شاعر و لسانیات نا ماہر غوث بخش بہار نا ہند ائے، ہرا کیئی سختی سوری سہا ولے راج دوستی و وطن دوستی نا بیرک ئے مدام بڑزا کرے، شام ئنا تارمئی ہر کُنڈا تالان منّنگ ئٹی اس و بس اورماڑہ نا دیار آن پیشتمّنگ ئٹی اس ہندا نْیام ئٹی ایب ءَ کھیب اسہ پین شار ئسے نا پِن ہم خننگاکہ “پسنی” پسنی بھلّو شار ئسے(آبادی نا حساب آ آہہ ، آرٹ و ادب نا حساب آ” ہمو پسنی ہرا مبارک قازی ، منیر مومن ،انور صاحب و ورناغا “سینڈ آرٹسٹ” آتا اُرا ائے ۔ ننا اُست ئٹی ہُرینہ زہیر ئس اس کہ پسنی نا مخلوق ، ادیب و آرٹسٹاتو ملّون ولے دا ارمان ئے ننے پین وخت ئسیک زندہ تخوئی تمّا ، انتئے کہ یونیورسٹی نا پروگرام ٹی پسنی شار آ ہِننگ الّو و سدّھا گْوادر شار آ ہِنوئی اس ۔ بس تینا رفتار ئٹ ہنسّا گْوادر شار ئے کھیب شاغسہ اس ای و سنگت غلام شیشہ غاتان پیشن نا مُر مُر خننگوکا روشنائی تِہ ہُرانہ ، نن تون برابر ایلو سیٹ آ یکّہ تولوک سنگت عمر ہم گْوادر نا خننگوکا روشنائی تِہ ہُنّنگ ئٹی اس و تینا ذہن ئٹی گْوادر نا قسمت نا زیہا کیئی سوجاتِتون جنگ کنّنگ ئٹی اس ۔ نن اسہ تارمئو خیال ئسے روشن کرینہ و بروکا وخت ئنا گْوادر و بلوچ کِن روشنائی خنانہ انتئے کہ دا خننگوکا روشنائیک بلوچ نا ڈغار آ بِدر نا جاگہ غاتیٹ اسّر ۔ نن نا پاس اس بس ئنا دا مہن ہیمہن ایلو گاڑی تا توار اس و گْوادر نا جہیئا ورناک موٹرسائیکل آتا دانگی ہینگی پھیری کریرہ ، قاضی صاحب آن سنگتاک رہینگِنگ نا ہرّفیر پارے کہ اسی اِرغ ئس کُنین رہینگنگ نا انتظام “تربت یونیورسٹی گوادر کیمپس” نا ہاسٹل ٹی مسّنے ، بس تورے و سنگتاک دھڑنگار “کندیل ریسٹورنٹ” نا کُولر آتان دیر کُنگر و ارغ نا پاریر ریسٹورنٹ ئے چلّفوکا مری بلوچ اسّر لہجہ تا مکرانی الّو ۔ بش منّنگ آ قاضی صاحب سنگتاتِہ پارے کہ سہب ئنا وختی تیار مریرے “فری زون؟” ئٹی پروگرام ئے ۔ استاد شاہ جی ہاسٹل نا گیٹ آ سلس، چوکیدار گیٹ ئے ملا تو بس تہہ ٹی پیہا سنگتاک گوادر کیمپس نا ہاسٹل نا کمرہ غاتا مہن کریر اسہ مہربانو ، ایجوکیٹڈو واجاس سنگتاتِہ حال حوال کرے و “ننیئی ئو کاریم نا “پارے ، گْوادر نا ایجوکیشن نا ہیت مرے تو شہید زاہد آسکانی نا پِن ہم اُست آ بریک او ہمو استاد ہرا شہید استاد صبا دشتیاری و شہید استاد رزاق زہری نا “سائنٹفک ٹیچنگ میتھڈ” ئٹ تینا مخلوق ئے ایجوکیٹ کنّنگ خْواہاکہ ہراڑان علم و دانش نا بھلّو خزانہ ئس ملّاکا ہرادے جہالت برداشت کنّنگ کتّو و تینا جاہلی ئے نشان تِس ۔ بلوچ انت انت ئے، دیر دیر ئے اُست آن دے؟ دنّنگ کپّک!

سہب ئنا سنگتاک تیار مسّر و ناشتہ غان پد گْوادر بازار نا تہہ ئٹ “فری زون گْوادر” نا کنڈا راہی مسُّہ ، مچّھی ہلوکا و کشتی جوڑ کروکا بلوچ نا تاریخی آ ڈغار ئے امرو امرو پِن تنّنگک “فری زون” پارہ کِہ زبان نا ترقی ٹی ہمو زبان خواجہ غاتا بھلّو دُو ئس مریک ہرا پوسکنو خیال تخلیق کیرہ و مارکیٹ نا پیداواری عمل ٹی بشخ ہلیرہ گْوادر ، سیندک ریکوڈک ، سوئی آ خواجئ اگہ بلوچ نا مریسس، طبقاتی تقسیم مفیسس تو انگریزی و چینی زبان تیٹ ہیت کروکاتا دنیا ٹی لوٹ مار و استحصال نا بنیاد آ تینا زبان تِہ تالان کنّنگ( انگریزی آن مُست ہمر انگلینڈ ئٹی لاطینی زبان نا راج اس) نا بجائے براہوئی و بلوچی تینٹ تینا ہی ڈغار آ پیداواری زبان مسّرہ ، تعلیم ، تخلیق و پٹ ءَ پول نا زبان آ چائنگارہ، نہ تو غلامی ٹی خْوانینگ و اونا زبان ئے بیرہ نوکری چاکری کِن ہیل کنّنگ و اونا بیوروکریسی نا بندغ ئس جوڑ منّنگ علم دشمنیس ارے، راج دشمنیس ائے، بے سمائی و مردہ ضمیریس ہم ۔

بس، پی سی ہوٹل نا بج و گْوادر کرکٹ اسٹیڈیم نا مہن نا پاسو آن جاگہ سے آ ہڑسا ہرادے سرکاری آ بندغاک خوشی ئٹ ” پاک چین بزنس سینٹر فری زون گَوادر” پائرہ، کس اگہ علم ئے، سچائی ئے، تاریخی حقیقت ئے منّیک تو “گَوادر” بِہ آہہ “گْوادر” آن سوا ایلو کُل لوزاک پد ئنا ایجاد ءُ ناجائز ءُ، زبردستی نا ٹھپّہ ءُ ۔ سیکیورٹی والا تینا “فری زون” ئٹی داخل منّنگ آن مُست بسّ ئٹی لگّا و ننا پِن تِہ ہرّفے ،ننے انت پِن ئس مرو کہ کس ننا راجی ٹیوار و پجّار آ جلو کروک مرے و ننے پائِہ تینا شناخت ئے کرفبو نن انت پارون کہ نن دیر اُن و نی دیر اُس ؟ “فری زون” پروگرام نا سرہال دا وڑ اس:

” Regional Dialogue on the Role of Parliament in Promoting Exports, Trade and Commerce Under CPEC in Balochistan” پروگرام نا بِنا ٹی نصیر خان کاشانی ( چیئرمین گوادر پورٹ اتھارٹی) تینا خیالاتا پھاشی ئے کرے و سرمایہ داری نا گِڑاس پروجیکٹ نا ذکر ئے کرے ، او کاریمک اراڑے مریرہ اوفتا حوال ئے نن گوادر نا باشعورو شہری سے آن مُہنی بننہ ۔ مُہنی ہیت کروکا تیٹی شاہ زیب کاکڑ (ڈائریکٹر جنرل گوادر ڈیولپمنٹ اتھارٹی) ، اسلم بھوتانی ( ممبر آف پارلیمنٹری کمیٹی آن سی پیک) و شیر علی ارباب( چیئرمین پارلیمنٹری کمیٹی آن سی پیک) اسّرہ ،پروجیکٹر آ

” Promoting Blue Economy Under CPEC”
نا زیہا بھلّو لفّاظی مس ولے پروگرام ٹی عوامی روزگار و کاروبار، آسراتی، بلوچ سمندر و بلوچ ماہی گیر نا بنیادی آ گِڑاتان اسٹ آ ہم ہیت متو ، ساحل نا ہخّسو ایریا ئس نِشان تسّرہ سہی حوالہ ئٹ لس بلوچ راج آن اودے یکّہ کنّنگ کِن کاریمک چلّارہ، ہنداڑے تولوک گْوادریس توار کرے کہ دا ننے “سیکیورٹی زون” ئس لگّک ۔ بنیادی حوالہ ئٹ دا پروگرام ہی طبقاتی اسّک ، گُڑا لس مخلوق نا انت ہیت ئس مرو ؟ پروگرام نا آخر ٹی پینل ڈسکشن مس تو گْوادر نا باشعورو ، کماشو شہریس شاہ زیب کاکڑ ، نصیر خان کاشانی ، اسلم بھوتانی و شیر علی ارباب نا دھوکہ بازی و غیر حقیقی آ ہیتاتا زیہا اوفتا گروپ نا مُہنا بیان ئس تِس ہرانا زمینی حقائق آک ہم گواہ اسّر او انت پارے ؟ اونا جند ئنا لوزا تِہ خْوانینہ:
“گوادر پورٹ کا جو معاہدہ ہے اس کو کوئی پڑھے تو سر شرم سے جھک جاتا ہے، اور چین صاف واضح ہے کہ اپنے فری زون اور پورٹ کی حد تک ڈیولپمنٹ کرے گا گْوادر شہر کو ٹَچ نہیں کرے گا۔ فری زون میں کسی لوکل کے لیے کوئی گنجائش نہیں، گوادر کے بڑے مسائل تعلیم، بجلی، پانی اور روڈ سے متعلق ہیں آپ اندرونی شہر جا کے دیکھ لیں”

غریب ئنگا بلوچ نا دتر تِہ چُوشوکا ہُرار مزہ اف تو دا شہری ئے چُپ کرفّیر و ہیت ئے دانگی ہینگی خسّار، شہری پِٹّاکا کہ دا ننا فریاد ائے ، محرومی ائے ولے او تینتو ہیت کنّنگ ئے شروع کریر ، سنگت غلام اوفتا دا رویہ غان سخت رنجیدہ مس کہ پین ئے خدا دے دافتیٹی اسٹ نا ہیت ئے بِننگ نا ہم تمیز اف ۔ قبضہ گیر و نوآبادیاتی لشکر نا رویہ ، تعلیم و تربیت ٹی ہم بندغی نا سبخ مفک اوڑتون ذاتی مفاد و چاپلوسی نا ہیتاک مریرہ۔ گْوادر یونیورسٹی کیمپس نا طالب ئس ایم پی اے حمل کلمتی آن شکایت کرسّہ چھار طالب نا فیس ئنا مسئلہ ئے پارے کہ اوفتا فیس ئنا رہینگنگ نا وجہ غان یونیورسٹی ڈگری تفک تَا ، سی پیک کمیٹی والاک دا ہیت ئے بِنگُر تو حمل کلمتی ئے پاریر کہ اِرا طالب نا فیس ئے نن چون و اِرٹ نا ئے نی تیس۔ دا اَرا کھئوکا ایجوکیشن سسٹم ائے و اَرا بے سوادا سخاوت ائے؟ گوادر والا ہندا اسٹوڈنٹ پارے کہ کنے ہِچّو اومیت ئس اف کہ داڑے تعلیمی ترقیس مرو انتئے کہ دائسکان داڑے نا بنیادی آ خْواستاک پورو افّس ہندا میٹنگ ئٹی اگہ “ہیومن نِیڈز” آتِہ کیٹیگرائز کروکا ماہر ماسلو مسّکہ تو پکّا گْوادر یونیورسٹی کیمپس نا دا طالب نا پیشانی آن بُک ئس ہلککہ ۔ ولے نن خل ئنا بُھت اسّن ننے ٹی احساس نا چھٹ الّو ۔
دہن ئنگا بے مرادا “ڈائلاگ” دیرے وڑو کہ ہراٹی لس عوام نا ہیت مف ، پوسکنو پوسکنو پروجیکٹ نا پِن آ زمین قبضہ کنّنگ و مخلوق ئے اوفتا مسئلہ غاتِہ پاننگ آن توننگ، اسیکہ ہندن لگّاکہ کہ نن گْوادر ٹی افّن بلکہ کامریڈ ہوچی من نا امریکی دور ئنا ویت نام ٹی اُن ہراڑے انسانیت نا ، برابری نا و انصاف نا لخ خلّنگاکہ ۔ ولے ولدا دا خیال بسّکہ کہ نن سید ظہور شاہ نا گْوادر ٹی اُن “سید گنج” نا لکّھوکا سید نا گْوادر ٹی اُن ۔ نن گْوادر نا “فری زون” ٹی اسّنہ ولے گْوادر “فری زون” ٹی الّو گْوادر فری زون آن ، پی سی ہوٹل آن و کرکٹ اسٹیڈیم آن ڈنّا اس ، اونا زبان، اونا راج، اونا فن ، ہر گِڑا ۔داڑے مصنوعی ءُ دنیاس اس ایڑے فطری ءُ داڑے بیرہ دروغ و منافقت نا ہیت اسّک، سچ پیشن اسّک ، سچ گْوادر نا ٹیچر، طالب، زالبول، مزدور، ماہی گیر، فنکار، شاعر، ادیب تون اسّک دا پروگرام اوفتا الّو بلکہ پیشن نا سرکاری مشینری و مقامی ٹشو پیپراتا اسّک ۔ پینل ڈسکشن نا ایسری آن پد قاضی صاحب ای و سنگت غلام سنگت سجاد و ایلو سنگتاتِہ دانگ ہینگ ہُران خنتون انتئے کہ اوفتا پینل ڈسکشن پین کمرہ سیٹ لگّاسس ،ننا پین ئسیٹ۔ ہراتم نن “بزنس سینٹر” نا شیفا بسّن تو سنگت سجاد ، سنگت نوروز پنجگوری و ایلو سنگتاتِہ خنان ، گْوادر کیمپس نا طالباک ہم خُڑک خننگارہ ۔

فینن الجزائر نا غلامی و فرانس نا قبضہ گیری نا خوڑتی ئٹ جاچ ئے ہلکس، او غلام راجاتا نفسیات نا زیہا ہم لکّھانے کہ او امر تینے ، تینا راج ئے، دود ئے بے خْوند سرپند مریرہ و اسہ وختس ئسکان قبضہ گیر نا ہر ہر ہیت ئے راست پارہ ۔ہندا ندارہ “فری زون” ٹی ہم اس استحصال و لوٹ مار نا لشکر ٹی اوار مروکا بلوچاک و بیرہ نصابی کتاب خْوانوکاک تتّوسہ کہ”بزنس سینٹر” ٹی سرکار نا اَرا اَرا گِڑا ئے گلانگِن ، و دیر دیر تو جنسار ہلین ، دیر دیر ئے وا وا کین ،جی جی کین ۔ دا تِیبہ پروگرام انت ئکن مس و دِنّا دنیاک داڑے ہِننگ ئٹی ءُ؟ ننا خفا بوڈ ئس کُنتوکَہ کِہ داخسو بھلّو ہیت مس ولے گْوادر ٹی تو کُنوئیئو دیر اف؟ دا ہم سوچ کتّونہ کہ گْوادر ننا ہی اُرا ائے تینا اُراغا کس مہمان آن بار و بِدر آن بار ہنپک، نن چینی تون مِلّنگ ائے ، اوفتا عارضی جاگہ ٹی تینا جنسار ہلفّنگ ئے و بے احساس والاتا ہیتاتِہ بنگُنہ ٹُور مسّنہ کہ آسودئی و آسراتی ہندادے، ہندن الّاہیئو وخت ئس “فری زون” (کُلوزڈ زون) ئٹی برباد مس ۔ اَرا حال ئسیٹ تھوبہ ئس ننا قبول مس و “فری زون” نا دوزغ آن پیشتمان ۔

گْوادر تو راجی سوت “ما چُک ایں بلوچانی” نا لکّھوکا استاد عبدالمجید نا خلق ائے ، ہرا سوت خان گڑھ و ڈیرہ غازی خان آن چاہ بہار ، کراچی آن شال و زابل و جیونی ئسکان بلوچ نا زبان آٹ ائے ۔ پی سی ہوٹل نا چھاں آن پد ہوٹل نا بُڑزی آن شار ئنا پین عکس ئس خننگاکہ گْوادر نا دا ندارہ ٹی استاد میر احمد نا بلوچی شئیر ئسے نا توار سفا اُست ئٹ دھڑنگاکہ
؎ سبا ءِ وشبو انت یاسمین انت
منی زمین انت منی زمین انت
گْوادر نا زیبائی نا خیال ٹی ہمّل دشمن تون جنگ کرسّہ اس و بلوچ ساحل نا حفاظت کِن جان ئے تلفّ آ تخاسس، دشمن وس کریکہ ولے ہمّل دشمن نا ہچّو چمّ ئسیٹ بنّنگ ئٹی الّو، ہمل آخریکو دم ئسکان دشمن نا خن تیٹی خن تِہ خلکس ، پاروس ہمّل نا توار خفتیٹ پِنّاکہ
؎ منی زمین اِنت منی زمین اِنت
پوسکنا دنیا ٹی بھازا نظریہ و فکر نیاڑی تے کن حق و انصاف نا ہیت کیرہ ولے ہندا ہی دور ئٹی بلوچ نیاڑی زرینہ بلوچ، بانک کریمہ و ملک ناز نوآبادیاتی سماج نا ظلم ئنا نشانہ مریرہ ریاستی غیر مہذب و فیوڈل سوچ ئنا دُو آن کیئی نیاڑی تا عزّتاک تار تار مسّنُہ ، ولے ریاستی سردار ، نواب و ملّا نا جوزہ و ایمان ہِچ سُرتّنے۔ اینو ہم “فری زون” ، گْوادر کرکٹ اسٹیڈیم و پی سی ہوٹل آن خُڑک بلوچ نیاڑیس کاٹم آ پاٹ مَنَہ ہفّیسس اُراغا ہِننگ ئٹی اس ۔ دا ہمو جاگہ ائے و ہمو راج ئے ہرانا زمین آ قابض و اونا نوکرک سرمایہ داری نا لالیچ ئٹی دنیا ئے بٹنگِنگ ئٹی ءُ ، سوچ کبو کوہلو ، جھل مگسی، وڈھ ، و سوراب نا عام بلوچ نیاڑی تینا امیرا ڈغار آ امرو امرو خْوارو وخت گدرو ۔

گْوادر بازار نا روڈاتان گدرینگانہ تو جہہ جہہ آن سرکاری ، مُلّائی و سرداری سیاست نا وجہ غان تباغا وڈھ ئنا انفراسٹرکچر ہم یاد بسّکہ ، تو گچینا موسم ٹی خدا بخش حلوا والا سنگت نا ہیتاک ہم حلوا غان بار ہنین اسّہ، دا سنگت ننے استاد خدابخش نا فنّ ئنا بارت ئٹ ہم سرپند کرے ۔ سنگت شرجیل ، سنگت صبور ، سنگت احسان ، سنگت غلام و ای سد و پنجا والو چھار ، چھار پنچ ،پنچ ڈبّا ہلکُن و واجہ ئے خدا حافظ کرین ! وخت ئس بابا مری بلوچستان نا حوالہ ئٹ پاریسس کہ روڈاک ننا ءُ روڈاتا پِنک ایلوفتا ءُ ، گْوادر والاک تینا وطن دوستی و راج دوستی ئے، تینا روڈ ئسے غوث بخش بزنجو نا پِن آ کرسّا پھاش کریسُر ۔ ماہی گیراتا دیدار آن پد گْوادر والاتا زبان و ادب دوستی نا نشانی سید ہاشمی نا مجسمہ نا ہم کسری دیدار ئس مس ۔ سمندر سید نا خن تیٹی اونا بھلّا مقصد ئے خناکہ تو تینے اسہ پُھڑیس سمجھاکہ و تینا وجود ئے سید نا قلم کِن مَس کنّنگ خْواہاکہ ولے سید اوکان ہم مُر سوچاکہ و سید نا قلم اونا پاک ئنگا و راست ئنگا جوزہ غاتان سیاہی ہلککہ و لکّھاکہ ۔

دے لہر ئٹی اس خرّنا سمندر نا چھولاتیٹی بلوچ مید ئنا مُتکنا کشتی تینا مُہن جھول کُنگکَہ، آخر ٹی شاشان آن بارو بھلّو خیال ئسے نا سیخا ٹی تینا ماہ گل (گْوادر) ئے الّان و اوتھل کِن پیشتمان ۔ نن ہِنان امر؟ نن تو ہمیڑے اسّن، نن بسّن امر؟ نن تو ہمیڑیک اُن ۔