بلوچستان ءَ بلوچ زالبولانی کِرد
نبشتہ کار : نئیم مومؔن
دنیا ءِ تہ ءَ ھچ راج زالبولانی مدت ءُ کمک ءَ ابید باج نہ بارت ءُ مرچی من وتی راج ءِ مات ءُ گْوھاراں جْھد ءِ ھَواری ءَ گند آں گُڑا ھمے گَپ پَدر بیت کہ مئے راج انگت زندگ اِنت۔
جْھد ھرچ وڑیں بنت، لھتیں ناانساپی ءِ ھلاپ ءَ جْھد کنت ءُ لھتیں وتی گلزمین ءِ جْھد ءَ بَھر زور اِیت۔ ھنچو کہ شُما سرپد اِت کہ شال ءَ بولان میڈیکل کالج ترامگیج ءِ ھلاپ ءَ مئے بلوچ گْوھاراں زھرشانی کُت ءُ وتی منزل ءَ سُوبین بوت اَنت ءُ بلوچستان ءِ شاھدربر جاہ بلوچستان یونیورسٹی ءِ بےزمیریں اُستادانی کُتگیں کارانی ھلاپ ءَ جُوانیں وڑے ءَ توار چِست کُت۔ دوئمی کیچ ءِ شھید بوتگیں زالبول ملکناز ، کلسوم ءُ شاھینہ شاھین ءِ کُوش ءِ ھلاپ ءَ توار اِش چِست کُت ءُ یک نوکیں آشوبے دیم ءَ آورت ءُ ھمے گَپ پدر کُت کہ اد ءَ کَس ایوک نہ اِنت اد ءَ یک تیوگیں راجے یکجاہ اِنت۔
اگاں ما ھورت بہ چار ایں وھدیکہ پِرانس ءَ پَلستین ءِ مردمانی سر ءَ زلم کُت گُڑا آکبت ءَ پلستین ءِ زالبول گوں وتی جْھد کاراں یکجاہ بوت اَنت ءُ زلم ءِ ھلاپ ءَ تَوار اِش چِست کُت ھمے وڑا بازیں زالبول کُشگ بوت اَنت بلے وتی جْھد اِش برجم داشت۔
بلے بژن کہ مئے چاگرد ءِ تہ ءَ زالبول ءَ را ھچ بستار دَیَگ نہ بُوتگ ءُ آ ھر وھد ءَ چَہ آزاتیں زندمان ءَ دُور دارگ بوتگ اَنت ءُ نیم چمی چارگ بُوتگ اَنت۔ آھان ءَ چَہ لوگ ءَ ڈن دَرایگ ءِ ھچ موکل نہ رس اِتگ وتی لوگ واجھانی گُلام بُوتگ اَنت۔ بلے نّی باید اِنت کہ آھان ءَ یک آزاتیں زندے دَیگ بہ بیت پرچاکہ چاگرد ءِ تہ ءَ زالبول یک بلائیں ارزشتے دار اِیت گُڑا مارا پہ رژنائیں بانداتے ءِ واست یک وانندگیں چاگردے جوڑ کنگ اَلمی ایں ءُ ردیں ھیال ءُ جیڑہ ھلاس کنگی اَنت۔
من سلام پیش کن آں وتی شیرزالیں بلوچ مات ءُ گْوھاران ءَ کہ آ ھر وھد ءَ زلم ءُ ناانساپی ءِ ھلاپ ءَ توار چِست کنگ ءَ ساڑی اَنت گوں وتی مڑاھداریں بیل ءُ ھمبلاں ھمراھداری کن اَنت۔
ھمے واست ءَ مئے بلوچ گْوھاران ءَ لبز کامریڈ ءِ نام دَیگ بوتگ پرچاکہ کامریڈ ھما مردم ءَ را گْوش اَنت کہ ھمک وھد ءَ گم ءُ سکّیاں گوں وتی راج ءَ ھَوار اِنت ءُ ھمک ساھت ءَ راج ءِ راھبری ءَ کنت ءُ ھمک گم ءُ جنجالانی دیم پان بیت۔
