کوزہ گیر و بلوچ راج

نوشتہ : محمد جان درویشؔ

کوزہ گیر ہرادے انگریزی ئٹ ”کالوناٸزر“ پارہ ہرا نا مانہ کوزہ کروکا مریک ۔ کوزہ گیر ہرا وخت آ اگہ راج ٸسے آ کوزہ کرے تو ہمو راج ٸنا زیہا تینا ( کالونیل پاليسی ) یانی کوزہ گیری والا چم و چالاکی تہ کاریم ئٹی ہتیک ۔ او راج ٸنا تولنگ، بش مننگ ،دود، رسم و رواج متکُنا تاریخ آتہ بدل کیک و تینا رسم رواج، ثقافتی گِڑاتہِ اوفتا زیہا تالان کیک، ہندن او ہمو راج و چاگِڑد نا تینا نفسیات ئے ہم پُھلنگ کِن اوفتا زہن ئٹی تینا سوچ ئے ودی کننگ خْواہیک ۔ ہمو راج ٸٹی زبان، دود و رسم ، سڑداری نظام ،فرقہ بندی ، تون اوار اوار مزہب نا کُمک ئے ہلیک و اونا زندگی ٹی بدلی ہتیک تاکہ او تینا وطن ، تینا تاریخ نا مُتکنی و آزادا زند ٸکِن جہد کپّس، توار ہفپس و ہندا چمّاتا دُو آن کمزور مریر، کنا مسخت سرسوب مرے ۔

تاریخ گواہ اے کہ ہمو راجاک ہرا دور ٸسے ٹی کوزہ گیر نا غلام مسّنُہ ہمو راجاتا سیاسی ، معاشی، مزہبی و دود رسم آتا تاریخ ٸٹی بھاز بھلو بدلی بسّنے ۔ کوزہ گیر ہرا شکل و دْروشم ئٹ مرے او تینا چم و چالاکی تان بیدس مننگ کپک و ہر وڑ ئٹ تینا چم و چالاکی تِہ مونا ہتیک ۔ اینو دے ئسکان ہرا راجاک اونا کوزہ نا شکار مسّنہ تو بھاز آ رد و بدلی تا سوَب آن ہنداخس مسنے کہ او تینا دود و رسم ، زبان و راج ئے ہم رد کرینُہ ۔ ہندن نن ہُرن کہ اینو دا ہمو نوآبادیاتی چال و چالاکی تا اسہ بشخ ئسے کہ او بلوچ راج ٸنا نیام ئٹ زبان نا بنیاد آ راج ئے یکہ یکہ کننگ خْواہیک ولے داڑان کُل واخب ءُ کہ بلوچ اسہ راج ئسے بلوچی و براہوئی اونا جتا جتا زبانک ءُ ۔

بلوچ راج دنیا نا تاریخ ئٹ ہم اسہ متکنو راج ٸسے ہرانا متکنی نا مہرگڑھ نا متکنا نشانیک گوا ءُ ، نُہہ ہزار سال مست ٸنا مہرگڑھ تہزیب نا وارث بلوچ قوم آ ہم بھازا کوزہ گیراتا جلو مسّنے ۔ بلوچ ہمے وخت آن تینا ڈغار کِن مونی ہنانے جنگ کرینے کوزہ گیر تا کوزہ ئے تینے آ منّتنے ۔ او گڑا عرب ، پرتگیز ، نا کوزہ مرے یا انگریز آتا بلوچ ہر وڑ ئٹ اوفتا مونا سلیسُنے ۔

ہرا وخت آ انگریز نا لشکر کلات آ جلو کرے تو اونا مونا 13 نومبر 1839 ٸٹی خان کلات مہراب خان بھاز دلیری و بہادری ئٹ سلیس و گڈیکو وخت ٸسکان جنگ کرے، او تینا وطن نا زیہا شہید مس اینو ٸسکان ہم او بلوچ تاریخ ٸٹی اسہ بھاز بھلو پِن ٸس دوئی کرینے، ہندن انگریز نا ناپاک آ گھام تہِ تینا سرزمین نا زیہا نورا مینگل ہم منتو دا جنگ ئے مونا ہیس اینو ہم نورا کن اونا لمہ نا پاروکا مودہ زندہ اے ۔۔

انگریز بلوچ قوم ٸنا پِرغنگ کِن اونا طاقت ئے کمزور کننگ کِن بلوچستان نا سرزمین ئے بھاز جاگہ غاتیٹ تقسيم کرے ، افغانستان ، ایران ، ایلو پنجاپ ئٹی شاغا تاکہ داڑان بلوچ راج ٸنا اسٹی نزور مرے ۔ ہندن او تینا بھلّائی ئے برجا تِخنگ کِن سرداری نظام ئے ہم پوسکنو وڑ ئسیٹ مونا ہیس ۔ و مخلوک نا زیہا تینے آن گچین کروکو سردار تخا ، ہرافتِہ بلوچ راج سنڈیمن نا جوڑوکا سردار پاٸک بلوچ قوم ہرافتہِ بھگّی چِھکوکا سردار پاٸک۔۔

ہندن زبان نا پِن آ ہم بلوچ راج ئے بشخینگ نا چال ئے برجا تِخا، براہوئی ئے یکّئو راج ٸس و بلوچ ئے جتاؤ راج ئس کننگ آ کاریم کرے تاکہ او تینا مسخت ٸٹی سرسوب مرے ۔ خواجہ ڈاکٹر فاروق بلوچ تینا کتاب (بلوچستان و برطانوی مورخین) ئٹی لکھیک کہ کلات ٸٹی 1410ء آن ہلیس تہ 1948ء ٸسکان کمبرانی و میروانی تا حکومت مسنے اوفتا زبان براہوئی مسنے ولے او بلوچ آ رُست مریرہ ۔ کوزہ گیر تینا چمّاتیٹ مزہب آن ہم بھاز کاریم ہلیک، اودے تینا مسخت کِن استعمال کیک ۔ ہندن مزہب نا استعمال ئٹی فرقہ واریت نا زریعہ ئٹ نفرت ودی کرینے اینو ایلم تینا ایلم آن نفرت کیک کہ فلانی دا فرقہ غان اے ، و فلانی اِے فرقہ غان اے ۔

دا کُل چال و چم بازی تِہ کوزہ گیر بیرہ دا خاتِر آن کیک کہ او تینا اسل کاریم و اسل راجی آ فکر آن مُر مریر ۔ اینو نن ہُرن تو بلوچ قوم ٸنا نسل کُشی ہر وڑ ئٹ مننگ ئٹی اے، کوٸٹہ__ کراچی روڈ ہرادے اینو بلوچ راج موت ٸنا کسر ٸس پاٸک ہرانا زیہا بھازا لمہ غاتا ورناک ایکسیڈنٹ مسّہ، دا روڈ اسہ بندغ کنوکو کسر ٸسے، ایلو بھازا جاگہ غاتا اینو نشہ ئے ہم لس کننگ ئٹی ءُ ، و ورناتہِ خْواننگ ، چاٸنداری ، علم و آگاہی، شعور نا کسر آن مُر شاغسہ نشہ نا رواج ٸٹی خلینگ ٸٹی ءُ ۔ اینو نن غور کین تو کُل آن زیات بلوچ آبادی خاص وڑ ئٹ مکران ، لیاری ، حب چوکی ، دا جاگہ غاتیٹ نشہ کروکا بندغاک زیات مریرہ ۔۔ ہندن او تینا چالاکی و چم بازی نا زور ئٹ ترقی نا پِن آ اسہ پوسکنو دْروشم ٸسیٹ راج ٸنا لٹ ئہ پُل ئے برجا تخانے، بابا مری پاٸک کہ :”کس ئے انت ٸس ہلکنے او داخس مُر آن برے و نمے ترقی تے“ کوزہ گیر تینا مکست کِن ترقی نا پِن آ پین رنگ ئسیٹ وسائل لُٹیک ۔ ا

کارل مارکس پاٸک کہ ترقی لُٹ ئہ پُل نا پوسکنو دروشم ٸسے ہرانا پِن آ بھاز آسانی ئٹ مخلوک نا استحصال مریک ۔ اینو نن خوڑت ہُرن تو ہندا ترقی تننگ نا پِن آ گْوادر نا مخلوک ئے کُننگ کِن دیر اف، ہندن ڈیرہ بگٹی نا ہال ہم ننا موناٹے، ہراکا کیئی سال آتان بھلو کچ ئسیٹ گیس پیشتمک دائی ہیئی کائک، ولے اوڑے نا مخلوک ئے دیر ہم اف ۔ داخس ہم دیر اف کہ او دنیا ئے الّوکا بندغ آتہ تینا سلّر ۔ ہندن اینو نن تعلیم نا کُنڈا کان تو بیرہ نوکری و پیسہ کِن خواننگ ئے فرض ٸس جوڑانُہ ، اینو ڈگری تو بھاز ارے ولے شعور تخوکو بندغ بھاز کم اے ۔

شہید پروفیسر صبا دشتیاری پاٸک کہ دا تعلیم ہندنے کہ انسان نا تخلیقی صلاحيت آتہ کُنیک چُھٹفِک، اینو ہر کس تینکِن خوانیک راج ٸنا غم افک ۔ اینو نا خْوانوکا تینا راجی آ ہر گِڑا اے بےکار سرپند مریک و کوزہ گیر نا رسم ئے تینا رسم آن بُڑزا پائک ۔ دا وڑ نا بندغ آتا زہن اوفتا مفک بلکہ دا ہمو کوزہ گیر نا زہن مریک ہراکہ جاگہی مریک ، ہرا کوزہ مروکا راج ٸنا زہن ئے تینا کننگ کِن دا سوچاتِہ ودی کیک ۔

Leave a Reply

Your email address will not be published.