انقلابی تعلیم (اولیکو بشخ)
نوشتہ: وہید انجمؔ
آشوب (انقلاب) تینا تہہ ٹی وسیعو مفہوم ئس تخک دادے پُہہ مننگ کِن ننے علم، دانش و شعوری عمل نا جائزہ ہلوئی تمّک ۔ اوڑتون اوار دا ہم ہُروئی تمّک کہ انقلاب یعنی بھلّو تبدیلیس ہتنگ و نظام ئس ختم کننگ پوسکنو نظام ئس ہتنگ نا مقصد و کُل آن جْوانَنگا طریقہ غاک انت ءُ؟ انقلاب ہمرکہ نظام ئے چَپّی کیک تو تینا پوسکنا نظام ئٹی انسانی ضابطہ حیات ئے ہم بدل کیک ۔ بندغ نا جند ئنا بدَلینگ تو اوار سماج ہندن کائنات (فطرت) ہم انقلابی مداخلت آن اول نا سلپّک بلکہ بدل مریک ۔ داخسا بھلّا تبدیلی ٹی تعلیم نا، نہ بیرہ بنیادیئو کاریم ئسے بلکہ بھاز خُڑکو تعلق ئس ہم ارے ۔ ہمرکہ سازش ئٹ انقلاب نا پِن آ گِڑاس تبدیلی و ترمیم ئے انقلاب سمجھینگک ہندن تعلیم نا دائرہ ئے ہم انتہائی محدود کننگانے ۔ داسا داڑے سوال بش مریک کہ تعلیم (ایجوکیشن) انت ئسے؟ داڑکِن ننے “عِلم” ئنا کُنڈ آ ہِنوئی تمّو، یعنی اگہ نن “علم” انت ئسے ؟ نا سوال آ مُہن کپّنہ تو تعلیم ئے بِہ سرپند مننگ کپّنہ انتئےکہ تعلیم تینٹ علم حاصل کننگ نا تخلیقی پروسیس ائے، مطلب کہ تجربہ و مشاہدہ غان ہلیس جذبہ و عقل ئنا تخلیقی نتیجہ غاک علم ئنا کسر ئے مُستی دیرہ ۔ ولے حاکم طبقہ غاک زیادہ تر تعلیم نا تصور ئے بیرہ رسمی تعلیم (فارمل ایجوکیشن) اِسکان دنیا ٹی تالان کننگ خْواہیرہ، داڑان دا مریک کہ تعلیم تینا تاریخی و جہانی نظریہ غان یکّہ مرسہ اجتماع نا بجائے زاتی منشا سیک تیاری نا وسپہ (ذریعہ) ئس جوڑ مریک ۔تعلیمی شعبہ نا سامراجی تقسیم تون اوار طبقاتی دنیا ٹی ہر فکر و خیال یا تو حاکم طبقہ نا حق ئٹی مریک یا محکوم طبقہ نا، نْیامیکو طبقہ(مڈل کلاس) مظلوم نا سنگتی نا پِن آ حاکم طبقہ نا تھالی چٹّیک ۔ جاگیردار و بزغر، سرمایہ دار و مزدور، نسلی بنیات آ شیف بُڑزی و قومی غلامی دا تینٹ تینا آخری نتیجہ ٹی عالمی و تاریخی طبقاتی جنگ ئنا تہہ ٹی بریرہ کس اگہ دا تاریخی پروسیس ئے سمجھیتنے یا سمجھیسہ منّپک تَہ تو اونا علمی پختگی آ بھروسہ کننگ شخصیت پرستی ٹی منّنگ کیک استدلال ئٹ مننگ کپّک ۔ طبقاتی جہان ئٹ تعلیم نا تصور ئے بورژوازی ڈیپارٹمنٹل تقسیم کاری ایلو مکمل تعلیمی عمل ئے سماج و کائناتی رشتہ غاتان یکّہ کننگ سامراج (سرمایہ داری) نا استحصالی پالیسِیس جوڑ مسّنے۔ حالانکہ تعلیم تِیبہ غان تِیبہ نظامِ زندگی نا نمائندگی کننگ کیک و کائنات ئٹی انسان نا متحرک مننگ و تخلیقی مننگ نا ہَر ہَر پِڑ آ دَھڑیک ۔
دا خاطر آن کِہ تعلیم نا تعلق سماجی سرگرمی تونے و سماجی سرگرمی نا تینا تاریخی پس منظر ئس ارے ہرا ترقی کرسہ کرسہ داڑیسکا سر مسّنے و مُستی ہم نشوونما تَہ چلّو ۔ ولے تعلیم نا حاکمانہ تقسیم ئٹی قبضہ گیری فارمیلٹی پورو کننگ آ زور تخنگک، دا ہُننگپک کہ تعلیم نا سرجم آئیڈیا ٹی انت انت اوار ءُ و اونا کچ اخس در بھلُن ائے؟ علمی میدان ئے داخس چُھنک کننگ آ تعلیم نا کائناتی انقلابی تھیوری داڑے گُم مریک، اگہ مریک تو ایلو پاسو آ محکوم طبقہ نا کردار ئٹی مریک ۔ تعلیمی طبقاتی کشمکش ئٹی بُڑزنگا طاقتاک مظلوم نا آزاد مننگ نا بحث آن زیادہ خوف کُنیرہ ہندا ہی وجہ و اوفتا تینا خُلیس آن زندگی نا بنیادی سوالاتا ڈیبیٹ نا بجائے جُزوی و غیر منسلک آ سرگرمی تا خْوانینگ و خْوانیفِنگ نا پارت مریک ، اگہ دہنو ماحول ئسیٹ مظلوم نا جِند ئے تینا نجات نا کسر ئس ملّیک تو او اصَل ٹی مظلوم نا جِند ئنا تعلیم نا تاریخی شعور آن ملّیک ولے دا کشمکش ادارہ غاتا تہہ ٹی بھاز خُوڑتی ئٹ مریک و وختس تینے شدت ئٹ پھاش کیک ۔ سامراجی تعلیمی نظریہ تینا نتیجہ غاتیٹ انسانی آزادی نا درس تنّنگ کپّک ہرا خن آن ظاہر لوٹ مار نا ہوَس و مزاحمت نا خُلیس آن طاقت ئے تعلیمی انداز ئٹ تالان کننگ و انسان نا آزاد حیثیت ئے کم کننگ آ کاریم کیک ۔ اونا رَد ئٹی انقلابی علمی نظریہ (انقلابی ایپسٹمولوجی) کائنات، سماج و بندغ نا ڈویلپمنٹ ئے اسہ ہمہ گیرو ربط ئسیٹ ہُرِک و نظریہ ئے یاد کرفنگ یا بیرہ عمل نا درس ئے تفک بلکہ عمل ئے تینٹ ہم تعلیم ئس تکّیک ۔
انقلابی تعلیم ئٹی اِرا گِڑا عمل نا عِلمی پہلو و مزاحمتی تسلسل نا عالمگیریت مُچ انقلابی ادب ئے خْوانینگ نا تخلیقیئو مرکز ئس جوڑیک ۔ ولے انسان دشمن تعلیمی تصور ٹی رسمی تعلیم (فارمل ایجوکیشن) و غیر رسمی تعلیم (اِنفارمل ایجوکیشن) ئے بورژوازی اکیڈمک تون روایت و ثقافت نا فرسودہ غا پہلو تا چمّ ئٹ رد انقلاب کِن کاریم ئٹی ہتنگک، ہراڑان ترقی پسندی و آزادی نا جہد ئے کمزور کننگک ۔ ہمرکہ انسانی آزادی نا بنیادی سوال ئے ڈھکّینگ کِن اصطلاح سازی کننگک، انقلاب نا شدت ئے ختم کننگ کِن باٹغ آن چُھنکو چُھنکو تبدیلی ہتنگک ہندن ہی آزادی نا بنیادی فکر ئے ہم تعلیمی تقسیم ئٹی غائب کننگک ۔ بھلّو وخت ئسے آن رسمی تعلیم آ قابض نظریہ اثر کرینے ہِنانے کہ اوڑے زندگی ، شعور، آزادی، نظریہ، مساوات، انصاف نا دانشورانہ ڈیبیٹ تخنگپک بلکہ منصوبہ بندی ئٹ خْوانینگ نا عمل ئے مسلط کننگک ۔ سامراجی تعلیمی ڈسپلن تینٹ ہی غیر ڈسپلن ئسے ہرا خوف و ظلم ئنا وار ئے راست کننگ کِن جوڑ مروکے ، دہُنا ڈسپلن نا پِن آ غیر ڈسپلن ئے پِرغِنگ انقلابی تعلیمی ڈسپلن نا زمہ واری ائے ۔
عالمی حاکم طبقہ غاتا شعوری تنگ نظری داڑان پھاش مریک کہ او سماجی سرگرمی خاص وڑ ئٹ انقلابی مزاحمت نا عِلمی بنیاد آن خُلیرہ و بدل ئٹی اودے جاہِلی نا پِن تیرہ ، ہنداڑان اوفتا تعلیمی تصور نا یونیورسیلِٹی نا وے مننگ ظاہر مریک کہ باشعور و بےشعور، عالِم و بےعلم نا فرق ایجوکیشن نا مکمل سماجی آزادانہ تناظر ٹی مریک نہ کہ طبقاتی ادارہ غاتا بےکاٹُما فیصلہ غاک عِلمی پِڑ آ چلّینگرہ و نئے قبول کننگرہ، بلکہ دافتا تضاد ئٹی مزاحمتی تعلیم لس مریک ۔
انسان و کائنات نا مجموعی رشتہ پائک کہ انسان تینے بدل کننگ ئٹی ہی فطرت ئے بِہ بدل کیک، ولے حاکمانہ تدریسی عمل ٹی دا جان اف کہ او تبدیلی نا بارت ئٹ بندغ نا زات ئٹی دہُنو ہلچل ئس بش کے، یا آزادی نا محبت ئٹی اودے غرق کے ۔ انسان ئے تعلیم نا حساب نیمہ کسر آ اِلّوکا نظام ئٹی طبعی تعلیمی شعبہ و سماجی تعلیمی شعبہ آتیٹ نہ کہ بھلّو مُرّیس نظر بریک بلکہ عالمی طاقتاک طبعی تعلیم آتیٹ تینا مرضی نا پَٹ ئہ پول کیرہ شِنگ کیرہ تاکہ دافتا رنگ ئٹی ہنسّہ مظلوم تینا مظلومیت نا سوال ئے گیرام کے ۔ ہندا طاقتاتا سوچ ئٹی گُم مرسہ وختس مظلوم تینٹ ہم تعلیمی و تحقیقی بنیاد آ اوفتا بیانیہ آن متاثر مریک لیکن حقیقت ئٹی طبقاتی دنیا ٹی دنیا ئے ہُننگ نا نظر (ورلڈ ویو) مُچ انسانی نگاہ مفک بلکہ سماج و کائنات ئے سرمایہ دارانہ عینک ئٹ ہُنّنگک ۔ فطری عِلماتا زیہا مروکا تحقیق آتیٹ ہم سرمایہ خرچ مریک، او سرمایہ زمین آ پِھر آن بار تمپک بلکہ محنت کش طبقہ نا قدرِ زائد ائے ہرا کائناتی تحقیقی پروجیکٹ آتیٹ لگّیک ۔ یعنی نن دا پاننگ کینہ کہ طبعی عِلماتا شونداری نا انسانی محنت و خْواری تِہ درسّہ حاکم طبقہ محکومیت ئے تالان کننگ ئٹی ائے ہراڑکہ فطری تعلیمی شعبہ تون اوار سماجی شعبہ غان ہم کاریم ہلّنگک ۔ اگہ سماجی مسئلہ غاتا زیہا تحقیقی ڈیٹا مُچ کننگک تو معاشرتی سطح غا تعلیم نا پہلو ہرادے طبقاتی تعلیمی سرکل ٹی غیر رسمی (اِنفارمل ایجوکیشن) پاننگک اونا حساب آ مسئلہ نا راستَنگا صورت و روتہ غاتا زیہہ ئنا ادارہ نا قوتاک مِش شاغرہ و مسئلہ ئنا زیہا بس گِڑاس کاغز مون کننگک واہم انسانی سماجی پہلو آ وے بنّنگی نا وجہ غان مسئلہ ، مسئلہ ہی رہینگک ۔
