خاک ئے نا خن تا تِخانُن گلزمین

درویشؔ بلوچ

خاک ئے نا خن تا تِخانُن گلزمین
دڑد ئسے نے کِن سہانُن گلزمین

زیبل انگا گْواڑِخ آتا یام ٸٹی
نے خنانُن بس ہُرانن گلزمین

بس کرار اُستاتہ،،،، دا بے تاغتا
نے خنانُن،،، نن مخانُن گلزمین

نے کہ نن پروانہ مسُن شمع نا
تینے نن زندہ ہُشانُن گلزمین

بس اگہ وختس کلو نا پارہ غان
مون مُستی نن ،،،،، رڑانُن گلزمین

کس صنم نا، کس خدا نا زکر ئے کیک
نن تو نا ورد ئٹ ہِنانُن گلزمین

ہِس تِہ نا پارین خوڑدہ مہر ئسیٹ
خاک ئٹی نا خن ملانُن گلزمین

ِمِش تے آن نے، مَش تے آن نے پُھلّی آ
یکّوئی نن پُھل بِنانُن گلزمین

آخریکو کوک ئنا،،،، نن وارث اُن
سُہب ئسے نا ہم گمان اُن گلزمین