تنظیم انت ئسے؟
نوشتکار : نیک بلوچ
کُل آن مُست نن لفظ تنظیم ئے ہُرِن کہ او ارانگان بروکے لفظ تنظیم عربی زبان نا لفظ ئسے ہرا “نظم” آن پیشتموکے ہرانا مطلب خُلّینگ، گَھنڈینگ یا گِڑاس ئے ترتیب تِنِنگ، اسٹ کننگ ۔
تنظیم نا اصطلاح آن مراد بندغاتا اسہ منظمو گروہ سے ہرا اسہِ خاصو مقصد ئسیکِن یکجاہ کننگک۔
اسہ گروہ یا جماعت ئسے نا اسہِ مقصد ئسے کِن مُچ مننگ و سماجی ، معاشی، ملکی یا سیاسی ہوالئٹ تینے ترتیب تننگ یا اسِٹ مننگ و اواری تنظیم پاننگِک ۔
دنیا نا ہرا کُنڈا مرے انسان تِہ یکجاہ و اسِٹ کننگ کِن اسِہ تنظیم ئسے نا مننگ لازمی اے ۔ تنظیم نا بھازا دروشم و شکل مریرہ اُرا یا (فیملی) اسہ تنظیم ئس پاننگِک ہراٹی اوفتا گِڑاس مقصد مریک یا کاروباری ہوالئٹ مننگ کیک ایلو سیاسی تنظیم ، سیاسی تنظیم ہمو طریقہ کار اے ہرا نا تہہ ٹی راج ؤ سماج ئٹ زوراکاتا یا نابرابری تا دو آن مروکا ظلم ؤ زوراکی تا خلاف اسہ تنظیم ئس ننے درکار مریک ہرانا زریعہ ئٹ نن تینا سماج ئے اسِٹ کننگ کِن اسِہ جوانو کسر ئسیٹ جہد کینہ۔
تنظیم نا بنیادی سوچ اسہ خاص او مقصد ئسیکِن اوار مننگ ،اسِٹ مننگ
دا بنیادی سوچ اینو آن بھاز سال مُست آن ہَندُن مرسہ بسُنے
ہمرکہ زراعت نا عہد آن مختلف جہہ تا رہینگوکا مخلوق تینا زند ئنا مقصد آتیکِن اسِٹ مرسہ کرینُہ
ہراٹی تینا اِرَغ نا بندوبست تینا وطن و مخلوق ئے زوراکاتا حملہ غاتان بچفنگ کِن تینا مخلوق نا خیالداری تِخِنگ پین زند ئنا خْواست آ تیکِن ہَندُنو نظم ئس ایلو ڈھانچہ سے نا مننگ ضروری اس تو دا کاریمک تنظیمی عمل آن پورو مسّرہ۔ سماج نا اخس بندغ شکار کِن ہنور ایلو اخس بندغ مخلوق نا خیالداری ئے کرور ایلو شکار کروکا شکار ئے سماج ٹی برابری نا بنیاد آ بشخ کرور دا کُل کاریم تا ہُننگ کِن اوفتِہ اسہ نگران ئسے نا ضرورت تمّاکہ تو تینا تنظیمی رہبر نا ہیت ئے مننگ ایلو تنظیم نا ڈسپلن نا خیال تِخِنگ کُل ئنا تا زمہ واری اس۔
زراعت نا زمانہ ٹی تنظیم نا بنیادی مقصداک ہندا ہی اسُر لیکن سماجی ارتقا تو اوار تنظیم نا دْروشم ؤ صورت بھاز بدل مرسہ ہِنا ۔
تنظیم نا پوسکُنا دْروشماک ہژدَمیکو صدی ٹی یورپ ٹی صنعتکاری نا ترقی آن ہُننگ مریک۔ او وخت ئے صنعتی انقلاب نا وخت پارہ ایلو صنعتی انقلاب آن پد سرمایہ داری بھاز ترقی کرے تو دا وخت سرمایہ داری نا بھاز تالان مننگ آن سماج ٹی بھازا مسئلہ غاک ودی مسُر ہراڑان اسِہ طبقہ ایلو طبقہ غاتان تینا ملکیت ئے زیات کننگ نا کوشست کرے، دا کوشش اوفتہ ہَنداخہ در کھور کرے کہ او مظلوم و مزدور آتا ظلم و جبر زوراکی تِہ ودفِسہ کریر تو دا ظلم و زوراکی تا دو آن لس مخلوق تینا حق آ تیکِن یکجاہ مسُر ہراڑان پوسکُنو تنظیم ودی مس ۔
ہَندُن صنعتی انقلاب آن پد نوزدمیکو صدی ٹی یورپی کوزہ گیریت (کالونیل ازم) نا خلاف ایشیاء ، افریقہ، امریکہ ایلو بھازا ملک آتیٹی تنظیماک ودی مسُر۔
ہرافتا مقصد تینا وطن ئے کوزہ گیر نا کوزہ آن آزاد کننگ اس۔
تنظیم نا تاریخ نا اہم اِنگا وخت نوزدمیکو ایلو بیستمیکو صدی اس ہرا وخت تنظیم نا اسہ انتہائی منظمو دروشم ئس مونا بس او زمانہ ٹی تنظیم آتا منظم مننگ نا وجہ دا ہم مننگ کیک کہ بھازا نظریہ غاک مونا بسُر، مثال سوشلزم، مارکسزم، لبرل ازم، نیشنل ازم پین بھازا نظریہ غاک اوار اسُر ۔
انسانی سماج نا شروع دے آن اینو نا ترقی یافتہ دور اِسکان دا ظاہر اے کہ سماجی مسئلہ غاتہِ حل کننگ کِن ، سماج نا خیال داری کننگ ایلو سماج نا ترقی کِن بندغاتا یکجاہ و منظم مننگ لازمی اے ہَندا ہی بنیادی فلسفہ آن تنظیم نا تصور وجود ٹی بس
ہزارا سال آتا یام ئٹی ہر وخت مخلوق تینا قومی ؤ سماجی ترقی کِن یکجاہ ؤ منظم مننگ آن پھاش مریک کہ “تنظیم” انسانی سماج نا اسہ حقیقت ئسے ۔
انسان ہمو وخت اِسکان ہِچ کننگ کپک ہرا وخت اِسکان اسِٹ و یکجاہ متنے ۔
ہندا ہی جاگیرداری ، سرمایہ داری نا دو آن بلوچ سماج نا زیہا مروکا ظلم ؤ زوراکی تیٹی بلوچ تینے منظم ؤ یکجاہ کننگ کِن بھازا تنظیم آتا وڑٹ تینا حاکمیت کِن جدوجہد کرسہ بریک ۔
انقلابی تنظیم:
لوظ “انقلاب” نا معنی گِڑاسینا دامون ہیمون چکر خلّنگ، بدلی ہتِنگ ۔
سماج ئٹی انقلاب نا مطلب اسہِ نظام ئسے بدل کننگ ؤ اوڑان ترقی پسندو نظام ئسے ہتنگ نا جہد کننگ ۔
ظلم ئنا نظام نا جاگہ عدل و انصاف نا نظام ئس ہتِنگ انقلاب پاننگِک۔ انقلاب عوامی طبقہ کِن ضرورت مریک ایلو ہندا وجہ اے کہ انقلاب کِن ہر وخت مظلوم ؤ غریباتِہ توار کننگک انقلاب کِن مزدور ایلو بزغرتِہ بش کیرہ ۔
اسہ زمانہ ئس ہرا وخت انقلابی تحریکاتیٹی ورناک ایلو طالب آک مونا سلیسُرہ انقلابی شعور ئے تینا مخلوق ٹی بشخارہ ۔
اینو نن ہُرِن ہندا ہی مظلوم ، محکوم ،طالب، بزغر طبقہ انقلاب کِن بش مریک یا دا طبقہ ئے حاکم طبقہ تینا مفاد کِن انقلاب نا پِن آ بش کیک ہمر کہ نن پاکستان ٹی ہُرِن عمران خان ہرا انقلاب کِن عام مخلوق ئے روڈاتا کشا اوفتا جزباتاتون گوازی کننگ آ او انقلاب اف ہرادے سامراج تینا سرمایہ کِن کاریم ٹی ہتیک دا سیاسی چمبازیس مننگ کیک انقلاب پاننگ کپنہ تَہ۔ انقلاب ہمودے ہرا ظلم و جبر نا نظام نا مکمل خلاف مریک ۔
سامراجی نظام نا خلاف مظلوم طبقہ بش مریک او سامراجی نظام ئے بدل کننگِک تو دا انقلاب پاننگِک ۔
اگہ نن تنظیم ئے ہُرِن تو تنظیم انقلاب ئے ہتِنگ نا اسہ طریقہ کار ئسے ہرا نا تہٹی نی تینا سماج ٹی مروکا ظلم و نا برابری تا خلاف جدوجہد کننگ نا پاسوئی کاسہ ۔
ٹراٹسکی پائک کہ تنظیم کُل آن مُست اسہِ نظریہ ، اوکا پد کاریم کننگ ایلو اسہِ طریقہ کار ئسے
تنظیم نا دروشم ساندہ زمین نا زیہا سانڑی مریک تنظیمی سنگت بیرہ رہنما مفک بلکہ او مخلوق نا خواہش ؤ ضرورت آتہ بیان کیک او اسہ سائنسدان ئس بِہ مریک ہرا اینونا حالت نا زیہا خوڑتی ئٹ نظر تِخِک ایلو بروکا وخت و تناطر ئے پائک
ہندا ہی وجہ آن انقلابی سنگت ئے اسہ وخت آ سماج تو اوار مروئی ایلو سماج آن قدم ئس مونا ہم مروئی تمِک ہَندا ہی علم و شعور نا دامون ہیمون اسہ جوانو انقلاب ئس بننگ کیک۔
انقلابی تنظیم نا سنگت ئے فکری و علمی ہوالئٹ ہَنداخہ در پُختہ و مخلص مروئی اے کہ او نا مون آ اسہِ چُھنکو نا انصافی ئس اونا روح ئے ٹھپ کے ایلو ہنداخہ سوگو مرے کہ بھلا حادثہ بِہ اونا فیصلہ غاتا اثر شاغپ ۔
بلوچستان ٹی ہم انقلابی تنظیم آک بھاز ءُ ہرا تینا قوم ؤ سماج کِن ظلم و نا انصافی نا خلاف جہد کرسہ بریرہ ۔
بی ایس او بِہ اسہ انقلابی او تنظیم ئسے ہرا نا بھلو تاریخ ئس ارے ہرا اول دے آن سامراج، جاگیردار ، سرمایہ دار ، ایلو کوزہ گیر نا خلاف جدوجہد کننگ ئٹی اے۔
بی ایس او نا انقلابی تنظیم مننگ نا دلیل ننے اونا انقلابی تاریخ آن ملّیک کہ شروع دے آن اونا انقلابی رہنماک عالمی سامراج و کوزہ گیر طاقتاتا خلاف تینا جہد ئے برجا تخسہ بننگ ئٹی ءُ۔ بی ایس او نا ہندا انقلابی وجود نا خُلیس آن سامراج، کوزہ گیر و سردار و جاگیردار طبقہ غاک اودے نسخان تِننگ ؤ پِرغنگ نا کوشست ئٹی ءُ۔ ولے اینو ہم بی ایس او نا انقلابی سنگتاک اونا انقلابی روح ئے زندہ تِخنگ کِن میدان آ سلوک ءُ اوفتا جہد ئنا رنگاک ننے بلوچ تحریک ئٹی ہم نظر بننگ ئٹی ءُ۔
“تنظیم ایلو مقصد“
سیاسی، سماجی، معاشی ایلو عسکری (فوجی) یا پین تنظیم آک مریر او بنیادی ہوالئٹ اسہ “مقصد” اسیٹ مونا بریرہ ویدِس مقصد آن تنظیم آک مونا بفسہ ایلو تنظیم آ تا بنیادی حصہ اونا مقصد مریک
سیاسی بحث ٹی اسہ سوال ئس ساندہ مونا بریک کہ تنظیم ایلو مقصد نا یام ئٹی زیات اہم اراد مریک ؟
دا حقیقت تینا جہہ آ سہی اے کہ ویدِس مقصد آن تنظیم نا ظاہر مننگ ممکن اف لیکن دا حقیقت آن نن انکاری افن کہ تنظیم آن ویدِس مقصد نیمہ مریک ۔
مطلب تنظیم ایلو مقصد اسِٹ ایلو کِن لازم و ملزوم مریرہ اگہ مقصد مف تو تنظیم جوڑ مننگ کپک اگر تنظیم مف تو مقصد ہِچ کاریم نا مفک ۔
انسانی سماج ٹی وَدِی مروکا سیاسی تنظیم آ تیٹی کُل آن طاقتور آ تنظیم انقلابی تنظیماک مریرہ انقلابی تنظیماتا طاقتور مننگ نا بنیادی وجہ اونا “مقصد” مریک
انقلابی مقصد ہَنداخہ در طاقتور مریک کہ او تینا سماج ٹی کُل آن زیات مظلوم عوام ئے تینا پاسوئی چِھکِیک، انقلابی تنظیم آ تیٹی مخلوق ویدِس ایوِز آن بشخ ہلیک ایلو مقصد کِن تینے قربان کننگ آن خلیپک۔ داڑان دا معلوم کننگ کینہ کہ تنظیم نا تہہ ٹی مقصد اخس در طاقتور مریک دنیا ٹی تنظیم آتا ختم مننگ نا وجہ اوفتا مقصد آن مُرّی اے۔
نن داڑے تنظیم ایلو مقصد نا طاقتور مننگ نا دا مثال ئے تِننگ کینہ کہ
اِرٹمیکو ‘جنگِ عظیم’ آن پد امریکہ دنیا ٹی زیادہ تر خیسُن پیہُن نا مالک اس تو ہمو وخت آ ویتنام نا جنگ ئٹی امریکہ پیہا تو ویتنام ٹی کُل آن بھلو بجٹ ئس کاریم ٹی ہیس۔ او وخت ئٹ کُل آن پِنی آ جنگی جہاز آتہِ ویتنام نا جنگ ئٹ استعمال کرے ایلو ویتنامی تا بقول کہ امریکی سامراج داڑے زہریلی اوزار استعمال کرے لیکن طاقتور امریکہ تینا کُل زوراکی تا باوجود “کمیونسٹ پارٹی آف ویتنام” نا دو آن شکست کُنگ انتئے کہ کمیونسٹ پارٹی آف ویتنام اسہِ منظم او تنظیمس ئس او تینا نظم و مقصد نا بنیاد آ دنیا نا کُل آن زوراکا سامراج ئے تینا کمزور آ کوپہ غاتا شکست تِس ۔
ہَندُن انقلابی تنظیم آ تا کامیابی نا سوَب اوفتا مقصد مریک ہَندا ہی حساب اگہ تنظیم کمزوری نا کنڈا کائِہ تو اونا بنیادی وجہ مقصد مریک۔ ہرا تنظیم مرے اگہ او تینا مقصد نا زیہا سوگوی ئٹ سلتو تینا مقصد ٹی شش و پنج نا شکار مس تو او تنظیم ایسری نا کنڈا کائک ۔
تنظیماک تینا مقصد آ ہمو وخت آ سلِنگ کپسہ ہرا وخت اسکان مقصد نا زیہا تینا باسک ئے علم و شعور تِتنُہ۔
تنظیم نا تعلیم و تربیت نا سلسلہ ہمو وخت سلِک ہرا وخت تنظیم نا راہشون علم و ادب نا کنڈا بف یا او خلیس نا شکار مرے تو دا ہڑتوما دروشم ٹی تنظیم نا راہشون نا رجحان تنظیم نا تعلیم و تربیت آن پیشتِنگِک ہرا وخت تنظیم نا علم و شعور تِننگ نا سلسلہ سلیس تو اوڑے بے مقصد آ بحث آک ودی مریرہ ؤ کنفیوژن ، مایوسی نا ویلاک بش مریرہ۔ ہرانا بنیاد آ تنظیم نا مقصد کمزور مریک تو ہندا ہی کمزوری دشمن کن اوزار ئس جوڑ مریک ہراڑا او پروپگنڈا کرسہ تنظیم آ تہ کمزور کرسہ کیک دا حالت ئٹی تنظیم نا وجود ختم مرسہ کائک ۔
تنظیم نا بنیاد او نا مقصد مریک سیاسی تنظیماک بلخصوص انقلابی تنظیم آتیکِن دا ضروری اے کہ او جدوجہد نا شروع ٹی تنظیم نا مقصد نا زیہا ریڈیکل لٹریچر نا انقلابی تعلیم ئے مونا ہتیر ہندا ہی انقلابی تعلیم نا زریعٹ او تینا کیڈر ئے، نظریاتی سنگت ئے علم و شعور آن پُہہ کننگ کیرہ۔ اگہ اسہ تنظیم ئسیٹ نظریاتی تربیت مف تو او تنظیم جمود نا شکار مریک۔
تنظیم ایلو ڈسپلن :
ہمرو تنظیم اسیکِن مقصد آن پد اہم اِنگا بشخ ڈسپلن اے۔ ہرا تنظیم مرے اودے اسہِ پھاشو ڈسپلن ئس ارے ۔ڈسپلن آن ویدِس ہرا تنظیم مرے تینے تینٹ مضبوط کننگ کپک ایلو اسہِ انقلابی تنظیم ئسیکِن ڈسپلن پین زیات اہمیت تِخِک انتیکہ انقلابی تنظیم نا مقصد بھاز تالان مریک ایلو پاسو آ ہُرِس انقلابی تنظیم نا دُشمن اوڑان بھاز زوراور مریک حالانکہ انقلابی تنظیم آتا تہہ ٹی ڈسپلن بیرہ اسہِ خاصو دائرہ سیٹی کاریم کپک بلکہ فکر ایلو کاریم ہڑتوما دروشم آتیٹی اسِہ وڑ کاریم ٹی ہَتِنگِک ۔
ہمرو تنظیم ئس مرے اوٹی ڈسپلن ئے محدود مروئی اف
مثال : کارکناک تنظیم نا پاسو آن ملّوکا زمہ واری تا زیہا کاریم کننگ کپس ، تنظیم نا لٹریچر کمزور مرے ، کارکناک نظریہ نا بر خلاف مریر ، تنظیم نا بنیادی ڈھانچہ پامال کننگے یا پین وڑ ئنا فکری یا عملی مسئلہ ودی مرے ، دا مُچ دروشم آتیٹی ڈسپلن ئے اسہِ وڑ کاریم تیٹی ہَتِیر ۔
تنظیم ہخس کہ بھلُن مرے اوٹی ہزاراتا، لکھ آتا کچ سنگت مرے اے وخت ئسکان اوٹی ڈسپلن نا پابندی متنے او ہِچو مقصد ئسے نا پاسوئی ہِننگ کننگ کپک۔ ڈسپلن آن ویدِہ اونا بھلُنی یا بھازی اسہ غیر منظمو گروہ ئس پاننگور نہ کہ فکری و عملی ہوالہ ئٹ تنظیم ئس ۔
دنیا ٹی ہخس انقلابی تنظیم گچین وڑ ئٹ انقلابی جدوجہد کرینُہ اوفتا جدوجہد نا پد ئٹی ڈسپلن نا پابندی مسّنے ۔
تنظیمی ڈسپلن نا کمزوری نا سوَب آن تنظیماتا کارکناتا رویہ غاک جْوان مفسہ و اسہ تنظیم نا ممبراتا رویہ غاک اسٹ ایلو آن بدل نظر بریرہ ہندا وڑ اوفتا نظریہ ہم اسٹ مننگ کپک ایتم اسکا تنظیمی ڈسپلن نا زیہا یکجاہ متنُہ۔ انقلابی تنظیم نا تہہ ٹی ہم ڈسپلن نا خلاف ورزی اودے غیرانقلابی ءُ غیر سیاسی جوڑ کیک، ہندا وجہ غان انقلابی تنظیماتیٹ سنگتاتِہ ڈسپلن نا زیہا تعلیم و تربیت تننگک ؤ انقلابی جدوجہد ئے مونا دننگک۔
