بی ایس او وڈھ زون نا کُنڈان “کالونائزیشن ئُہ ڈی کالونائزیشن” نا سرہال آ اسٹڈی سرکل
بی ایس او وڈھ زون نا کنڈان اسہ اسٹڈی سرکل ئس “کالونائزیشن ئُہ ڈی کالونائزیشن” نا پِن آ اڈ تننگا ہرانا زیہا مرکزی کمیٹی نا باسک کامریڈ وحید انجم لیڈ آف تِس
سرہال نا زیہا ہیت کرسہ سنگت پارے کہ کالونائزیشن نا مطلب پیشن آن بروکو طاقت ورو ملک یا راج ئس پین راج یا ڈیھ ئسے آ کوزہ کیک تو کالونائزیشن پاننگک ہراتم ہمو محکوما راج پیشن آن بروکا زورآور نا خلاف آجوئی کن جہد کیک یا آجوئی دوئی کیک تو دا ڈی کالونائزیشن نا عمل پاننگک۔ دنیا داسکان ہم کالونائزیشن نا گْواچی اے، ہراڑے خاص وڑٹ کشمیر، سندھ، کردستان، فلسطین ئُہ بلوچستان ننے مقبوضہ ءُ وطن نظر بریرہ۔
سنگت مُستی گپ ئہ تران کرسہ پارے کہ کالونائزیشن نا عمل ٹی پانزدہ و شانزدہ میکو کرن ٹی زیات تالانی بس ہرا وخت یورپ نا مُلک آک افریقہ، امریکہ، آسٹریلیا ئُہ ایشیا نا ڈیھ تِہ کالونائز جوڑ کننگ نا بنا کریر پدا تیبہ دنیا ٹی تالان مسُر۔سنگت مونا ہیت کرسہ پارے کہ تینا ملک ئے اِلینگ ایلو وطن آ کْوزہ کننگ نا بنیادی مسخت ہندا اس یا ارے کہ ایلو قوم آتا مال مڈی تِہ دُوئی کرسہ تینا معیشت ئے سوگو کننگِہ۔
برطانیہ، کاروبار نا بہانہ غا ہندوستان ئے تینا کالونی جوڑ کرے پدا ہندوستان نا خیسُن پیہن تا لُٹ ئہ پُل ئے کرے۔ہندوستان نا کوزہ غان پد برطانیہ ئے بلوچستان نا مال مڈی ،دریاب ئُہ اسٹریٹجک اہمیت نا خبر تما تو ہندا خاطر آن ہندوستان نا تقسیم آن پد ہم بلوچستان آ اونا نظر سخت اس۔
١٨٧١ نا گولڈ اسمتھ معاہدہ ٹی برطانیہ دے کیہلینگی (مغربی) بلوچستان ئے بلوچستان آن کشّیسہ ایرانی قابض آتا ہوالہ کرے اوکان پد ١٩٤٨ ٹی خان قلات احمد یار خان ئے زور ئٹ الحاق کرفسہ مچّا بلوچستان آ کوزہ کننگا ہرانا پد ئٹی عالمی سامراج نا مرضی اس۔ پاکستان و ایران نا بلوچستان ٹی حیثیت استعماری اے ہرافک بلوچ نا ہِچو مفاد ئس ہُپّسہ بلکہ کالونیل وڑٹ بلوچ عوام ئے روزگار، تعلیم، ثقافت و زند ئنا ہر پہلو ٹی پدی بٹنگ خْواہیرہ، و بلوچ راج ئنا خلاف آپریشن آتیٹ تین پہ تینے کمک کیرہ۔
اینو بلوچستان ٹی کالونائزیشن نا سوَب آن اونا ساحل چاہ بہار و گْوادر پیشن نا طاقتاتا دُوٹی ءُ بلوچ ئے اوڑے ہِچ اختیار اف ہندن چاغی ٹی ‘بیرک گولڈ’ آن بارنگا استعماری کمپنیک بلوچ نا مال ئُہ مڈّی تِہ دُزّنگ ئٹی ءُ۔
ہندا خاطر آن بلوچ قوم ئکن تینا وطن نا زیہا اختیار کِن ڈی کالونائز مننگ نا کسر بچّوکے ہراڑکہ اسہ انقلابی ءُ جہد ئسے نا بکار اے۔ بلوچ نا سیاست ئہ معیشت آ اختیار ئٹی اونا ثقافت، زبان ئُہ جغرافیہ نا رکھ بریک ہراڑکن او اینو کالونائزیشن نا خلاف جہد کننگ ئٹی اے۔
